人大個咗先發現細個睇啲卡通原來咁邪惡，小智年紀輕輕就四圍食女，大雄就成日都偷睇人哋沖涼！不過都係大雄衰啫，唔關叮噹事嘅！55，一定係咁啦！毛毛都以為係㗎，點知最近日本出咗隻叮噹，搞到去夾公仔嘅人都忍唔住要面壁呀！

呢隻瞓覺瞓到紅都面晒嘅叮噹又確實幾可愛嘅，一定有好多擁躉想帶佢返屋企攬住瞓啫，難怪咁多搞夾公仔嘅舖頭都入貨啦～點知店員將佢綁繩放上機之後⋯⋯

嗚哇！叮噹你可唔可以唔好露出一個咁享受嘅神情呀？加埋呢個綁法，唔好話你呀，就連嚟夾公仔嗰個都畀你搞到紅都面晒喇～一定係個綁法有問題啫，嚇我唔到嘅！

呃，打直綁都好似冇咩幫助喎⋯⋯不如簡單啲就咁搵條橡筋箍住佢咪算囉。

都係冇嘢啦⋯⋯你鍾意點綁就點綁啦！叮噹，今次我都幫唔到你喇，無論點綁你上去，你個樣都好似講緊「嚟啦，鞭打本王啦！」咁，你叫人點放你入機好啫！

睇嚟店員都已經去到自暴自棄嘅程度，直接虐待叮噹紥住佢個頭算罷喇⋯⋯反正佢咪一樣咁Enjoy～

其實橫掂點綁都係咁邪惡，不如店員你哋直接同佢嚟個經典綁法，話唔定會仲吸引呢⋯⋯嗱嗱嗱，你又亂諗嘢啦，毛毛係指啲人見到叮噹畀人紥得咁辛苦，會吸引到多啲人嚟救佢咋！

封面圖片及資料來源：namco_nagasaki／twitter、gda_subarulove／twitter、twitpic