【閃光彈注意】男友收埋戒指喺頸鏈入面 等女友戴足一年先開封求婚

結婚梗係多嘢煩啦,但係對於男人嚟講,求婚先係最煩呀!梗係啦,又要浪漫又要難忘,事先仲唔可以畀女朋友知,咁先夠實派士呀嘛。不過男人諗到嘅嘢,咪又係搵人搞場大龍鳳,再唔係喺世界中心呼喚我愛你嗰啲囉,仲有咩呀?

其實求婚呢家嘢,笨唔一定要搞到好大陣仗,又直升機又九十九支玫瑰先叫浪漫嘅,花少少心思同時間做啲特別嘢,都可以令女友好冧冧豬㗎~

圖片來源:the Huffington Post

圖片來源:the Huffington Post

佢哋係Terry同Anna,拍咗拖兩年幾㗎喇。一周年紀念嗰陣,Terry親手用淚柏(一種只有塔斯曼尼亞先有嘅木材)整咗個鏈咀畀Anna,Anna 梗係好開心啦,仲日日當頸鏈咁掛喺身𠻹。

圖片來源:the Huffington Post

圖片來源:the Huffington Post

但係Anna又點會知呢份其實唔止係周年禮物咁簡單吖~喺年半後,佢哋一齊去咗蘇格蘭一個山窿度玩喎,嘩!咁刺激?

都真係幾激㗎,連刀仔都攞埋出嚟喎!唔通想開鮑魚?然後Terry就問Anna借咗條鏈嚟,哦~想開個鏈墜啫下化~

圖片來源:the Huffington Post

一劈!原來鏈墜入面收埋咗隻戒指呀!一周年嗰陣就已經諗定要落訂,Terry哥呢份決心同信心真係冇得彈吖!佢仲即場喺個山窿度向Anna求婚𠻹~Anna梗係好冧啦,話晒同佢一齊兩年幾,原來對方一早認定自己係佢結婚對象喎!
不過Anna第一個反應同毛毛一樣咁實際,就係⋯⋯X!如果佢呢年幾入面整唔見咗條鏈咪大L鑊!

圖片來源:the Huffington Post

好彩Anna呢一年幾都好珍惜條鏈,如果唔係就肉都赤埋啦~睇到佢兩個咁sweet,有冇人可以借副黑超嚟呀?毛毛睇唔到嘢呀。不過弱弱一問,如果嗰一年半內佢哋分咗手,又或者Anna幸福得濟,隻手指粗咗好多,咁隻戒指咪⋯⋯冇呀,毛毛邊係葡萄啫,假設下咋嘛。

 

封面圖片及資料來源:the Huffington Post

毛記電視網站 · 版權所有 · 不得轉載 Copyright © TVMOST.COM.HK All rights reserved