【我們都傻】包租婆你sure呢盒嘢可以清潔洗衣機?

洗衣機真係好偉大㗎,日日都要哽啲臭到冤嘅衫褲鞋襪,然後洗返乾淨畀你喎。不過再乾淨嘅洗衣機都會有污糟嘅時候,特別係個內籠,積落好多塵同細菌㗎!

圖片來源:愛評

好彩而家市面上都出咗好多唔同嘅洗衣機清潔劑,咁咪唔使再下下搵人拆個筒出嚟洗囉~

圖片來源:aruko0729/PTT

話說有位台灣網友就係發現自己租嗰間屋部洗衣機唔多乾淨,於是咪搵包租婆問下佢會唔會有洗衣機清潔劑囉~包租婆唔止好快手準備咗,仲好客氣好有禮貌咁send message同網友講擺咗喺邊𠻹!

圖片來源:aruko0729/PTT

雖然好似細盒咗啲,但係清潔劑嘅嘢,貴精不貴多吖嘛!上面仲寫明係某牌洗衣機清潔劑,去污、除黴又防臭,啱晒啦!

圖片來源:aruko0729/PTT

一打開,咦?一片片嘅?唉,而家洗衣液都搞到一粒粒啫喱咁啦,洗衣機清潔劑一片片,好出奇呀?掉入去咪會溶喺水入面囉~好似係⋯⋯

圖片來源:aruko0729/PTT

反轉佢睇睇,_你個街呀,啤牌嚟嘅!不過網友呢啲玩慣牌嘅人 ,又點會驚呀。「清潔階段,用同花順攻擊!」但係到咗Turn End,部洗衣機都係郁都冇郁過。

其他網民就話,包租婆想叫你洗牌咋!話唔定洗完牌,仲會好似星爺咁變咗隻皺咗嘅煙士出嚟𠻹啵。計毛毛話,好明顯包租婆就係發動咗陷阱牌,想你用生命值硬接啦!即係點?咁多要求,自己拎啲啤牌慢慢刮啲污糟嘢出嚟啦下⋯⋯

 

封面圖片及資料來源:aruko0729/PTT愛評

毛記電視網站 · 版權所有 · 不得轉載 Copyright © TVMOST.COM.HK All rights reserved