【畀我抖下啦】 日本動物蛋糕款款可愛 唯獨狐狸變咗死魚眼?

去旅行就梗係要食好西㗎啦!最好就係好食得嚟個賣相又靚,咁先可以順便影相Post上挨豬同FB呃like㗎嘛~好似日本咁,成日都出埋啲勁打耳嘅甜品,就連唔係特別好甜嘢嘅人見到都會忍唔住買呀!

圖片來源:kbooks_collabo/twitter

日本池袋就有一間餅店,入面有賣好多卡哇依呢嘅動物造型蛋糕㗎,睇下相入面,又有眼大大嘅懶猴,仲有呢一兩年人氣急升嘅樹懶𠻹!款款都咁得意,真係好想買晒返去呀~

圖片來源:kbooks_collabo/twitter

估唔到除咗啲熱門嘅可愛動物之外,就連成日畀日本人笑佢醜嘅翻車魚都畀餅店整得咁cute cute喎!不過呢樣都唔係令人最實派士⋯⋯

圖片來源:kbooks_collabo/twitter

最驚喜嘅係居然畀網友搵到呢款死魚眼嘅狐狸先生呀!天呀!明明款款動物都係行可愛路線,點解狐狸寧寧舍舍變咗個厭世樣嘅喂?

圖片來源:kbooks_collabo/twitter

圖片來源:kbooks_collabo/twitter

有網友就上網搵到張相,入面隻狐狸同個蛋糕一模一樣㗎!哦~原來呢隻係藏狐~呢個死魚眼嘅狐狸樣係佢嘅特色,完全表現出「你班_街畀我抖下啦」嗰種生無可戀嘅感覺呀!所以喺日本有好多人都好鍾意佢㗎,難怪要特登出呢款啦~

點解藏狐咁嘅樣?以毛毛9估,一定係因為佢一日到黑都畀人問佢幾多點,你班友仔又自己有電話唔睇,走去問佢喎,大佬,佢冇錶你都仲要問佢,點唔厭世吖?

 

封面圖片及資料來源:kbooks_collabo/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved