講起扭波，大家可能會諗起早前毛毛介紹過嗰位扭魔法棒氣球扭得好出色嘅日本扭波達人。其實日本作為一個盛產神之手嘅國家，又點會得一位扭波達人咁少吖？以下落嚟毛毛要介紹嘅扭波達人「Masayoshi Matsumoto」都一樣達到神級嘅境界㗎！一齊睇下！

嘩，使唔使咁大隻烏蠅呀？

冇錯，今次毛毛介紹呢位雖然都係扭波達人，但今次呢位達人鍾意扭嘅就唔係魔法棒，而係動植物，尤其係昆蟲呀！無論烏蠅、跳蚤定蠶蟲 ，任何昆蟲佢都可以用氣球扭到出嚟。唔止咁，有時佢仲會帶埋自己嘅作品去公園影寫真?～

大家睇下，個蠶蟲氣球用埋大自然做背景，係咪好似真嘅一樣咁呢？喂話時話，呢位扭波達人連結構咁複雜嘅昆蟲都可以扭得咁逼真，冇理由成日畀人當錯咗係昆蟲科目嘅蜘蛛會扭唔到呀嘛？

嗯，榮恩表示：「去去！蜘蛛走！」

老老竇竇，睇完咁多昆蟲氣球之後，毛毛除咗想打爆晒佢哋之外，其實都有少少想學扭波嘅衝動嘅⋯⋯狗仔同劍仔，毛毛嚟喇！

資料來源：isopresso／twitter

睇埋：

【靚到癲咗】日本扭波高手再發功 今次扭美少女戰士魔法棒

【蘊藏住黑暗力量嘅鎖匙】日本扭波高手連小櫻魔法棒都扭到！