【要唔要實一甩】呢棵植物粒白色嘢咁似我啲雪米糍嘅?

作為一個稱職嘅為食精梗係要幾時都諗住食啦!但係食得多好易肥㗎啵,唯有出郊外行下山膠遊下,消耗返啲卡路里啦~減肥係為了食更多嘅美食吖嘛!

不過對於為食嘅人嚟講,一路行又冇嘢食真係好慘㗎喎⋯⋯55,一於經過超市買返盒雪米糍,一邊食一邊行,涼浸浸咁行先舒服㗎嘛~減肥?唔食返啲嘢邊有氣力減喎!

圖片來源:sawagani550cc/twitter

圖片來源:sawagani550cc/twitter

哎吔,幾時跌咗粒落去棵花度㗎?但我明明食咗一粒㗎啵,1,2,3⋯⋯8粒齊吖,咁呢粒喺邊度嚟㗎呢?

圖片來源:Fukunagaosamu/twitter

真相只得一個!原來呢粒好似雪米糍咁嘅嘢,係呢棵植物嘅一部份嚟㗎!呢棵植物日文叫ユキモチソウ,日本人通常都叫佢做雪餅草,真係草如其名呀!中間嗰粒嘢其實係佢嘅肉穗花序嚟㗎(總之就係呢種花包住嗰嚿嘢啦!)。

日本網友就係見到棵花,所以先特登行去超市買盒雪米糍影呢幅相咋~係咪睇到都想實一甩呢?其他網友睇到幅相都話好似呀,有網友仲話喺北海道阿寒湖都野生捕捉到綠茶大福𠻹!

圖片來源:nttcocomo/twitter

圖片來源:nttcocomo/twitter

咪就係呢啲毬藻囉~綠色一個個波咁又真係幾打耳嘅,btw,毛毛依稀記得呢樣嘢都好似喺香港紅過㗎啵,嗰陣仲賣到好貴一樽𠻹!唉⋯⋯本來想睇下啲植物嘅Post放鬆下啫,咁都畀你哋拉埋落啲嘢食度,搞到人哋而家又要去Pantry覓食嘞!

 

封面圖片及資料來源:sawagani550cc/twitternttcocomo/twitterFukunagaosamu/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved