【祖傳秘方】阿婆塊護墊膏布唔知係咪零感特薄㗎呢?

每個屋企都總有啲祖傳秘方嘅,例如辣親要搽豉油,撞到腫咗要用鞋底捽返平佢,諸如此類啦~我地而家聽到,梗係會話冇科學根據啦,雖則話有時啲嘢都係心理作用嚟㗎啫,但係啲老人家試過覺得Work吖嘛⋯⋯

好似台灣網友個阿嫲咁,老人家就難免會腰酸骨痛㗎喇。巴斯拯救宇宙咁忙,邊得閒成日做殺龍巴斯啫。婆婆咪求其搵過第二隻牌子貼囉,貼落又幾舒服喎!

圖片來源:謝沛霖

婆婆你塊膏布形狀咁特別嘅喂?仲要係棉質表層,高級嘢嚟㗎喎!呢啲咪叫潮囉~平日啲膏布四四方方又咁細塊,邊似得呢隻形狀咁特別咁貼身先得㗎?仲要超薄又有彈性𠻹!

圖片來源:謝沛霖

孫女見到之後,嚇到影相隻手都震埋呀(定笑到震呢)!叫咗你啲嘢唔好亂咁擺㗎啦,搞到阿婆拎錯嚟用喇!呢塊明明就係大膠布,止血用㗎嘛,點會係膏布啫!唔黐都黐咗啦,噴返啲藥上去敷,一樣㗎啫~

圖片來源:名校Secrets

其實係你哋啲人太傳統啫~Come on James,咩年代呀?邊個話M巾同護墊係M到先有用㗎,好似呢個DSE考生咁,諗到用M巾嚟索畫筆啲水,效果真係一流㗎。

圖片來源:Wai Lam Tang

再唔係好似呢個網友,利用護墊有黐力嗰邊防水嘅特性,暫時阻止個窗漏水,真係靈感IQ稱得上十分之高超呀下!

巴打見到咁好用,係咪都有興趣買返包傍下身呢?唔使怕醜喎,而家有男性衛生巾㗎嘛,邊個話女人先用得M巾㗎啫!

 

封面圖片及資料來源:謝沛霖、名校Secrets、Wai Lam Tang

毛記電視網站 · 版權所有 · 不得轉載 Copyright © TVMOST.COM.HK All rights reserved