【我想嘔呀】剪開個牛奶盒 入面竟然有塊牛皮膠紙?!

講到環保,好多人都淨係諗到開少啲冷氣或者將垃圾分類放入回收箱,搞到大家都以為環保一定好悶咁……其實大家做返個幼稚園小朋友,拎啲垃圾循環再用、整下手工,例如用牛奶盒整筆筒咁,都幾好玩㗎!

圖片來源:邱吆吆/爆料公社

台灣有個網民就話佢朋友飲完盒牛奶,諗住用得唔好嘥,廢物利用下啦,於是就剪開個牛奶盒喇。點知呢個時候先發現,入面竟然有啲唔應該出現嘅嘢!估唔到牛奶盒入面會有咁大塊牛皮膠紙呀下!問題係,要剪得開個盒,即係已經飲晒成盒牛奶啦,分分鐘仲要屙埋出嚟沖埋出大海𠻹,張膠紙又唔知黐過啲乜嘢、上面有幾多塵……真係喊出嚟呀!有請阿Sa:我想嘔呀.jpg!

圖片來源:邱吆吆/爆料公社

大多數網民見到之後,都話覺得好驚訝、好嘔心,不過都有少少人懷疑係樓主自己黐塊膠紙入個盒度作故仔呃like嘅。毛毛淨係覺得,剪開唔係見到小強或者四腳爬爬咪算好囉……

圖片來源:邱吆吆/爆料公社

哦……牛皮膠紙啫下話?使唔使咁大反應呀?牛皮膠紙同牛奶都係出自牛身上,咁生產過程當中唔小心跌咗入牛奶盒,都係好合理嘅事吖,嗯嗯。

 

 

 

封面圖片、資料來源連結:邱吆吆/爆料公社

 

毛記電視網站 · 版權所有 · 不得轉載 Copyright © TVMOST.COM.HK All rights reserved