2017年05月18日 星期四
【搵食艱難】成功捕捉黑貓去宅急便見工嘅一刻！
初夏，為大地帶嚟嘅除咗雨水同汗水，仲有大量Fresh grad學生哥呀！諗返起早幾年啱啱畢業，大熱天時著住套suit、帶住仲緊張過考會考oral嘅心情周圍去見工，每日都同陌生人講點解佢要請你（我人工低囉）、點解想入呢間公司（屋企一程車可以返到囉）、自己又可以為公司貢獻啲乜嘢（得嗰9k我畀埋條命你好冇），真係好青春呀……
最近，日本就有網民影到一個初出茅廬嘅新鮮人見工前緊張又躊躇嘅畫面喇！嗚呀，望住呢隻準備入宅急便見工嘅黑貓仔，當年見工嘅辛酸回憶係咪湧晒上心口呢！
「身份證、會考證書、填色比賽亞軍嘉許狀都帶埋，應該冇漏喇啩……好緊張呀喵！」
雖然你塊面係就係黑啲，不過輕輕微笑下應該ok嘅！畀心機呀，毛毛睇好你呀黑貓仔！
之後呢個後生仔點？佢由低做起，不辭勞苦，晚晚都OT當儲經驗，一級一級咁升上去，終於成為咗呢間宅急便嘅大老闆呀！不過，佢都冇擺起個老闆款㗎，依然落手落腳，親自監督速遞員送貨，抵佢咁成功嘅！你話吖，如果個個腦細都好似佢咁抵得諗就好喇！（冇呀，毛毛冇咩暗示呀。）
来てみた。 pic.twitter.com/u5Z5zDr4z2
— sasa×××くコ:彡? (@zogu8011) May 12, 2017
封面圖片、資料來源連結：zogu8011／twitter
