【不要得罪女人】男友掛住瞓甩底 畀女友化妝大整蠱

古乳有暈,寧得罪小人,莫得罪⋯⋯冇呀,毛毛冇話係女人呀!之不過女人畀男人激親嗰陣,佢哋即刻變咗復仇勇者,用佢哋嘅創作力量同幻想諗出各種大懲罰,真係諗起都有啲淆呀⋯⋯

好似以下呢位仁兄咁,同班兄弟出去飲酒已經好危險㗎啦,居然仲夠膽約女朋友第二日晏晝出去飲嘢喎!弊在佢實在太膠估咗自己喇⋯⋯同得一班兄弟出去玩,班兄弟邊有咁易放過你吖,最後呢位阿哥清晨6點先返到屋企,然後就變咗沉睡中嘅豬腳喇⋯⋯

圖片來源:每日郵報

咁鍾意做睡公主呀嗱⋯⋯一於畀你做飽佢!女友喺呢個時候拎咗佢平日神聖不可侵犯嘅化妝品出嚟,準備玩一個大家都好懷念嘅遊戲,就係⋯⋯

圖片來源:極點網

幫男人化妝呀!細個玩咗咁多次,經過十幾年來嘅苦練,今日終於可以大派用場喇!

圖片來源:每日郵報

圖片來源:每日郵報

由於時間嘅關係,女友已經幫男朋友化好晒個底妝,畫埋堂眉喇~眼晴係靈魂之窗,咁梗係要幫男友化個靚靚眼妝啦!長長嘅眼睫毛,真係好迷人呀~

圖片來源:每日郵報

圖片來源:每日郵報

畫埋個性感嘅咀仔,搞掂!一個麻甩男友畀你搞到好似山水豆腐花咁,真係見到都想鍚佢一啖呀(嘔)!難為男友瞓得咁冧,全程都冇醒過呀。

圖片來源:每日郵報

女友見仲有時間,幫佢修埋甲,髹埋最潮嘅Holo色𠻹!呢啲咁細心嘅女朋友真係去邊度搵呀⋯⋯

男友就係咁大覺瞓,瞓到第日清晨四點先起身,你實以為佢照鏡見到自己咁,會好似星爺咁嚇到問邊L個咁樣衰啦?

圖片來源:每日郵報

圖片來源:每日郵報

點知男友居然係好驚訝咁望住自己話⋯⋯原來佢扮女人都幾靚喎。睇嚟女友下次可以準備定多兩個木瓜⋯⋯55,煲木瓜湯啫。

 

 

 

封面圖片及資料來源:每日郵報極點網

毛記電視網站 · 版權所有 · 不得轉載 Copyright © TVMOST.COM.HK All rights reserved