放假諗唔到去邊好或者食乜好，梗係轆下Facebook，睇下有咩推介㗎啦，不過唔知點解好多標題都係寫「呃like最強」呀、「打卡必去」呀咁嘅，乜食嘢最緊要唔係好味㗎咩？原來個like先係最醫肚㗎？

嗱，喺呢個時代，咁諗就錯喇，呃like先係最緊要㗎嘛，唔係啲甜品使乜整色整水啫，都係想吸引妹豬買嚟影相擺上挨豬呃like，幫佢宣傳埋之嘛！你試下擺碗渣泎同杯雞蛋仔雪糕喺妹豬面前，睇下佢點揀吖！

雪糕周街都有得賣啦，點先可以成功吸引妹豬？睇下呢個例子啦，喺雪糕上面插個九彩咁嘅心心，雪糕筒上面又黐啲糖呀餅仔呀咁，啲味道夾唔夾冇人care㗎，最緊要就係夠晒大堆頭，一望落去多嘢到對眼都唔知望邊好，咁就為之very good喇。

你睇，喺挨豬search個舖頭名，真係有唔少妹豬拎住嚟影相㗎！

塵歸塵，筒歸筒……喺呢一片粉嫩粉嫩嘅畫面背後，有清醒嘅妹豬就發現雪糕店附近個垃圾筒，竟然有大量畀人遺棄嘅雪糕筒呀！睇嚟有唔少妹豬買完杯雪糕，影完相，食兩啖，覺得任務完成，所以就做咗大嘥鬼呀下。

其實呃like唔係話唔啱，不過買樣食物淨係為咗個like，浪費咗件食物，就折墮咗啲啫，聽老人家講，咁樣下世會冇雪糕食㗎。

友達と大須のかわいいアイス食べたんだけどみんなインスタ写真撮る目的だからかほとんど捨てられててインスタの闇を感じた(　˙-˙　) pic.twitter.com/xGgqRS3StH

— ♡R i n a♡クリマ両日M-227 (@ani__R) June 1, 2017

封面圖片、資料來源連結：ani__R／twitter