有時撞到啲人，望個樣總係覺得好熟，但就係點諗都諗唔到佢叫咩名，同樣情況卡通片界都成日出現㗎。其實有幾個卡通人物，毛毛都要花啲氣力先serch到個名～（你知毛毛平時搵嘅資料都係一click就有㗎嘛～）你哋呢班咁善忘嘅人，又知唔知佢哋叫咩名呢？事不宜遲～ level 1 !

Level 1 幼兒級

圖片來源：fansshare

Coro Coro Kuririn （人稱CK鼠）

呢個都已經係level 1，毛毛已經可以好大膽用1蚊做賭注，賭大家一定唔會知佢叫咩名～ 大家通常都係精品舖度見到佢，覺得佢好似毛毛咁咁可愛。但佢同毛毛一樣永遠都係配！角！我哋幾時先可以好似冇嘴貓咁咁出名？？

Level 2 幼兒高一級

圖片來源: Cartolinagratis

哈姆太郎－維維

佢哋講完嘢之後一定會講對方個名，你話係唔係啊哈姆太郎？ 但大家對哈姆太郎嘅認識淨係哈姆太郎，你話係唔係啊哈姆太郎？ 其實一年365日都戴住條頸巾嘅佢都好搶鏡，你又記唔記得佢叫維維呢，我估你都唔記得㗎啦，你話係唔係啊哈姆太郎？

Level 3 中級

圖片來源：imgur／dcard

我們這一家－ 藤野

我們這一家呢套卡通除咗講花師奶一家四口，其實其他分支都好吸引毛毛喺扮工時候睇。就好似阿桔同佢個好基友咁～咩啊？條眉粗粗哋，同阿桔好friend過打band嗰個啊～真係唔記得？人哋叫藤野啊！佢仲成日都話對阿柑好有興趣，好想要個家姐嗰個呀！

Level 4 就快打大佬級

圖片來源：niusnews

外星BB撞地球－路路少爺

「嗰個BB啊！嗰個啊～」明明佢係主角嚟㗎，但就係唔會記得佢叫咩名。應該係話成套卡通，就淨係記得個劇名。唔知點解毛毛個腦淨係記得套劇係有個BB飄下飄下，同埋首主題曲係幾好聽㗎！

level 5 真正大佬級

圖片來源：TVB 截圖

櫻桃小丸子－ 山田佳代子

最後一題，大家一定睇過嘅卡通片！一望到佢就會知佢係小丸子個同學，但個名就……大家對佢嘅印象真係唔會多，就連毛毛由細細個就睇小丸子，都淨係記得佢係乖乖女，傻下傻下。原來佢同杉山有過一段情，仲試過鍾意佢鍾意到想將對方個名寫落自己功課簿度，但就寫錯咗山田。啊，係傻下傻下嘅puppy love啊～

Level 1 到 Level 5都畀你玩哂啦，有冇估中啊～ 估中哂就等毛毛獎你一個「叻叻」貼紙啦～

如果全部都唔識，毛毛都可以體諒嘅～只係會覺得你有啲廢咯～

封面圖片／資料來源：fansshare／Cartolinagratis／imgur／niusnews／TVB 截圖