【打卡勝地】原來將啲屋髹成粉紅色唔止係為咗呃Like?

影相呃like真係一件好煩嘅事嚟㗎,不過呃like 都唔一定要成日去埋啲山卡罅地方。有時喺城市入面一啲人為嘅藝術作品都好值得影相留念㗎!

圖片來源:themostfamousartist/Instagram

搞藝術啫,使唔使拎住碌嘢喺咁噴呀?仲要噴隻咁鮮豔嘅Hot Pink,好搶眼啵!唔通係Barbie主題嘅屋仔?

圖片來源:themostfamousartist/Instagram

圖片來源:themostfamousartist/Instagram

嘩,仲要唔止噴一間屋,一次過噴成幾間𠻹!唔通又係啲有錢又有屋嘅人想讓全世界都知道佢哋嘅低調?咁噴法咪係人都知啲屋係你㗎囉!

圖片來源:themostfamousartist/Instagram

但係呢幾間喺洛杉磯嘅屋唔係屬於呢位藝術家Matty㗎啵,老友,搞藝術啫,搞埋人哋間屋,唔怕慈母搵你傾計咩?原來呢間幾間屋就嚟要拆嚟起豪宅,所以臨拆之前,建築商咪請佢嚟搞搞震咁囉~

圖片來源:the_art_junkie/Instagram

圖片來源:andrew_cirving/Instagram

圖片來源:lala_dreamer_/Instagram

成間屋裡裡外外都變晒粉紅色,最啱就係畀啲妹豬嚟打卡影相,跟手Post上挨豬喇!只要係挨豬打#pinkhouse,就睇到好多喺嗰度影嘅相㗎喇~唔止係妹豬,阿叔都好捧場㗎,仲有人喺嗰度影畢業相𠻹!

圖片來源:themostfamousartist/Instagram

叫得藝術家,搞出嚟嘅嘢就點都有啲背後意思嘅。原來啲屋除咗要嚟畀大家影相呃like,其實Matty仲想引起大家對Gentrification,即係士紳化嘅關注。始終每次拆樓起豪宅,都係代表無咁有錢嘅人要搬走,有錢嘅人就搬入個社區。

不過Matty呀,你好似就係建築商請㗎啵,你咁講怕唔怕倒人哋米呀?佢仲話最希望可以爭取到政府以後拆樓前都畀佢哋咁髹喎,有希望係好事嚟嘅⋯⋯

圖片來源:themostfamousartist/Instagram

雖然聽落幾有意思,有好多鍾意影相Post相嘅朋友仔都好捧場㗎,但係周圍鄰居就唔多高興喇,話晒無啦啦多咗堆粉紅色咁搶眼嘅嘢係屋企附近,又多咗咁多三唔識七嘅人出入,的確幾影響人嘅。

始終藝術呢家嘢,唔係個個都識欣賞㗎嘛,正如你腦細如果突然話要將成間Office變做Hot Pink,你都頂佢唔順啦~雖然你應該從來都冇順得佢順。

 

封面圖片及資料來源:themostfamousartist/Instagramthe_art_junkie/Instagramandrew_cirving/Instagramlala_dreamer_/Instagram

毛記電視網站 · 版權所有 · 不得轉載 Copyright © TVMOST.COM.HK All rights reserved