夏天去海邊聽聽風看海，幾寫意～但係呢排啲天氣一時曬一時落大雨，好難捉摸呀！最緊要喺沙灘度咁開揚，有啲嘢喺咁多人面前做，人哋會怕醜㗎～

如果有間沙灘小屋就唔同呢！閂埋門就可以有私人空間，但係又隱隱約約仲聽到啲海浪聲，正呀喂！約埋女神喺入面飲嘢睇日落一流呀！

好似呢間咁就差唔多喇，簡單得嚟都幾靚吖。不過望落入面好似細咗啲咁啵。如果你以為呢間只係一間普通嘅屋仔，少年人，你太年輕喇！其實呢間屋係有機關㗎！

個機關唔通喺個鐘度，轉下個鐘密室大門就會打開？你估拍戲咩～其實好簡單啫，個機關就喺地板！

咦，原來個地板打得開㗎喎，一打開就見到個窿，一於爬入去睇下係咩嚟先～

係一個遊戲房呀！啱晒做小朋友嘅秘密基地，如果細個有個咁嘅地方你話幾好呢～搬晒啲漫畫過嚟慢慢嘆，加多支大可樂，爽呀！仲未完呀！地板下面仲有一層㗎，真係好意外！好開心呀！

呢層幾有英國小屋feel，唔止有杯同茶壺畀你high個靚tea，仲怕你睇唔到海景，特登掛幅畫咗個港口嘅油畫你欣賞下?～

呢間秘密基地嘅做法都唔算好難，只要掘好個窿，再用木板固定就可以喇。咦，咁喺香港整返間，咪可以解決土地問題囉！Yeah！不過點駁Wifi同冷氣好呢下⋯⋯

封面圖片及資料來源：colinfurze／YouTube