【好玩唔玩】喺超市買棵椰菜花返嚟有sss嘅喂!

買餸嘅嘢,最忌就係「千揀萬揀,揀著個爛燈盞」。而最近,澳洲昆士蘭有位女網民就正正千揀萬揀,喺超市揀著個有sss嘅椰菜花嘞!到底邊位網民咁黑仔呢?事不宜遲,毛毛即刻同大家一齊睇下!

話說,網民‎Kimmy Pettit‎早前喺超市買咗個椰菜花。點知隔咗幾日,當佢諗住切開椰菜花嚟洗嘅時候,佢就發現個椰菜花嘅葉同葉之間有一pat啡色嘅不明物體喺度。為咗知道呢pat啡色不明物體究竟係泥定係sss,呢位網民決定聞下佢啦,然後佢就發現呢pat啡色不明物體有陣好熟悉嘅臭味喇⋯⋯嗚哇,係sss嘅味道呀!唔止咁,呢位網民仲話覺得係人類嘅sss𠻹! 

圖片來源:電影《破壞之王》截圖

於是呢位網民就將呢件事post咗去超市個facebook page度,睇下對方有咩回應啦。

圖片來源:Kimmy Pettit‎、Coles

對方知道呢件事之後就即刻向呢位網民道歉,又同呢位網民了解下個有sss椰菜花係喺邊間分店度買。呢間超市嘅關公冇卸膊兼咁積極解決問題,以關公嚟講都算係好關公㗎喇!而呢位網民都表示今次事件冇令佢有hard feelings,然後公主同王子都快快樂樂咁生活落去嚕。

 

 

 

資料來源:‎Kimmy Pettit‎/Facebook

毛記電視網站 · 版權所有 · 不得轉載 Copyright © TVMOST.COM.HK All rights reserved