【毛記專訪】人仔警示燈 隨時就喺你左近

抬頭望向香港市區嘅天空,應該都幾難搵到一粒星星。雖然天上冇繁星,但隨住城市不停建設、不停發展,你同我低頭嘅時候或者都會見到一盞盞喺路邊閃下閃下嘅道路警示燈。如果毛毛話畀大家知,原來呢啲喺街上隨處可見嘅道路警示燈都可以變成一件藝術品,唔知大家又願唔願意停落嚟望佢哋一眼呢?

 

「你好,你⋯⋯你見唔見到我呀?」

最近,插畫家Kila搞咗個為期30日嘅計劃-「Twinkle Twinkle Little Guys」,用畫筆重新賦予道路警示燈生命。喺計劃期間,Kila堅持每日要掛一個「小燈人」。就算早前天文台掛咗8號風球,佢都照樣出街掛燈(當然喺安全情況底下啦),可以話風雨不改。唔止咁,Kila每次掛完燈之後仲會喺Facebook同Instagram打卡,記低佢哋擺放嘅位置,方便「小燈人」嘅Fans去搵佢哋嘅蹤影𠻹!

Kila將小小太空人掛起

 

「不如過嚟同我影相啦好嗎? 」 

大家作為城市人,觀察力一啲都唔弱,只係少咗份熱情咁啫(正確嚟講,應該係怕畀其他人發現大家嘅熱情⋯)。Kila透過「小燈人」慢慢探索呢個香港,探索更多未知嘅故事,而「小燈人」亦透過Kila接觸到好多唔同嘅人。

小小太空人同TVMost buddy喺靜靜嘅街上

原來要捕捉佢閃嘅一刻係好難㗎!

 

「點解我會喺呢度?

可能大家都想問Kila,到底搞呢個計劃嘅目的係咪有咩想話畀香港知呀?Kila就話,其實每盞「小燈人」都唔係想帶出啲咩訊息,反而佢係想聽下大家對「小燈人」嘅解讀喎。

計劃一日一日咁進行,越來越多人留意到「小燈人」,而留言嘅亦唔再限於Kila嘅朋友,仲多咗好多住喺同一個城市嘅陌生人。觀眾將自己對作品嘅睇法講返畀創作人知,或者就係對創作人最大嘅回饋。有次Kila就收到個message,話覺得「小燈人」係Kila放落呢個城市嘅小魔法喎。(咦,咁Kila咪係魔法師?)唔知大家又點解讀「小燈人」呢?毛毛同Kila都好想知呀!

 

「可唔可以畀我喺呢個城市留多一陣呀?」

目前計劃進行咗一半,網民留言話「小燈人」被消失嘅消息都越來越多。到底係呢個城市唔容許「小燈人」留低?定係大家當咗「小燈人」係城市中嘅異類,唔想佢哋留低呢?雖然對於「小燈人」嘅消失,Kila都覺得好可惜,不過佢就覺得,既然自己都將呢個計劃Set咗喺呢個城市,如果「小燈人」係畀人刻意清走,咪當係送咗畀呢個城市囉。

(小燈人係屬於大家!請大家好好保護佢,畀佢喺呢個城市入面靜靜地發光啦!)

你搵唔搵到我呀?

 

「爸爸媽媽,多謝你哋將我創造出嚟!」

「小燈人」嘅誕生,就係Kila步出溫室嘅第一步。Kila形容自己係一個活喺溫室嘅創作人,因為佢平時多數都係喺畫廊搞展覽、接下畫畫job,一切都喺控制範圍之內,非常安穩。佢之所以有勇氣走出Comfort  Zone,面對一堆未知數,其實都係因為一直喺背後支持佢嘅女朋友。冇女朋友畀空間同支持Kila,毛毛相信警示燈永遠都係警示燈。(係呀,仲要係冇靈魂閃下閃下嗰隻呀!)

 

毛毛後記

訪問Kila當日落住毛毛細雨,佢同女朋友好細心咁幫毛毛準備雨衣⋯⋯係愛呀哈利!然後我哋一行三人,喺上環行咗轉,佢哋先決定到掛燈嘅位置。嗰時著住雨衣嘅佢哋,應該分唔到自己個身係流緊汗定雨水。佢哋好努力咁掛好個燈,影張最滿意嘅相,為「小燈人」做記錄。毛毛呢粒電燈膽企喺旁邊望住呢個畫面,Feel到嘅唔單止係佢哋多到滲出嚟嘅愛同溫馨,仲有佢哋對「Twinkle Twinkle Little Guys」嘅執著同堅持呀!希望大家都會好好珍惜「小燈人」同其他藝術作品啦!

毛記電視網站 · 版權所有 · 不得轉載 Copyright © TVMOST.COM.HK All rights reserved