【內有洋蔥】5歲患癌妹妹同好朋友行婚禮完成遺願

結婚係好多女仔由細個就有嘅夢想,著住套白色婚妙,扮到靚靚咁行禮,又確實係幾夢幻嘅!可惜唔係人人都有機會舉行自己嘅婚禮⋯⋯

圖片來源:英國鏡報

呢對小朋友係咪好可愛呢?見到佢哋執得咁正,又怕怕醜醜咁企埋一齊,就知佢兩個喺度搞緊一個小型婚禮啦!

圖片來源:英國鏡報

呢個笨唔係一個普通嘅小朋友婚禮咁簡單,其實呢個係5歲小新娘Eileidh妹妹嘅最後婚禮。因為佢不幸患上咗一種好罕見嘅癌症,叫做神經母細胞瘤⋯⋯醫生話,妹妹嘅病已經去到末期,好返嘅機會好微⋯⋯

圖片來源:英國鏡報

而妹妹嘅願望清單上面,其中一項就係想嫁畀佢最好嘅老友,6歲嘅Harrison小朋友喇。因為Harrison其實都好鍾意Eileidh,所以成班大人就幫佢哋搞咗呢個婚禮。呢班大人仲一齊扮鬼扮馬,又扮超級英雄,又扮公主咁氹佢哋𠻹!

圖片來源:英國鏡報

睇下Eileidh妹妹同媽咪笑得幾開心!話晒係一生人一次嘅大日子吖嘛!

媽媽仲爆料話喺醫院接受治療嗰陣,Eileidh已經成日同護士姐姐講佢有個男朋友仔,仲話要同男友結婚𠻹。而Harrison都係成日提住話好愛Eileidh,要娶佢做老婆㗎!

圖片來源:英國鏡報

咁而家佢兩個都總算係如願以償啦~雖然佢兩個唔可以執子之手,與子偕老,但係毛毛相信,呢份愛會一直保存喺佢哋心入面㗎!

 

 

 

封面圖片及資料來源:英國鏡報

毛記電視網站 · 版權所有 · 不得轉載 Copyright © TVMOST.COM.HK All rights reserved