【正呀喂】喺海灘執垃圾就換到可以當錢使嘅靚靚代幣

游水最正~游水最正~夏天去沙灘游水兼嬉水就梗係正啦,不過見到個沙灘一地垃圾,又玻璃又膠樽呀咁,真係咩mood都冇晒呀⋯⋯其實見到咁多垃圾,不如幫手執起佢吖,除咗幫到地球,話唔定仲有意外驚喜㗎!

圖片來源: 中時電子報

呢啲一塊塊畫咗隻海龜仔喺上面嘅嘢咁得意,咩嚟㗎?唔通係畀啲人玩片石仔用嘅?定係用嚟壓住啲紙嘅紙鎮嚟呢?毛毛知喇,梗係玻璃糖嚟嘞,一定係,除非唔係!

圖片來源:中時電子報

圖片來源:海湧工作室 - Hiin studio

原來呢啲係台灣小琉球海湧工作室用喺海灘執到嘅玻璃整成嘅「海灘貨幣」呀!叫得做貨幣,就梗係可以用嚟買嘢啦~

圖片來源:中時電子報

咁點先得到呢啲貨幣呢?唔通要以物易物,用港幣嚟換?物就係物,不過係廢物呀!用垃圾就可以換到當錢用嘅貨幣?有冇咁筍呀?

嗱,唔係你幾時去小琉球都有得換㗎,係要參加佢哋一個叫「愛龜淨灘接力賽」嘅活動,一齊幫手執海灘上面啲垃圾,完咗活動之後會秤返你哋執到嘅垃圾重量,每2kg就可以換一個貨幣,每人就最多可以換5個。

圖片來源:中時電子報

跟住就可以拎住呢啲嘅貨幣去有響應活動嘅店鋪消費㗎喇~睇佢列出啲店名,吃喝玩樂有齊晒,正呀!不過呢啲貨幣咁靚,叫人哋點捨得用喎~

如果唔想去親旅行都係得食嘢Shopping,想做啲有意義嘅嘢,不妨7月尾參加下呢個活動,話唔定啲台妹台仔見到你咁落力為環保,會主動過嚟識你𠻹啵!

 

 

 

封面圖片及資料來源:中時電子報海湧工作室 - Hiin studio

毛記電視網站 · 版權所有 · 不得轉載 Copyright © TVMOST.COM.HK All rights reserved