【有異性有人性】要影結婚相梗係同埋死黨一齊影㗎啦!

影結婚相聽落好似只係兩個人嘅事咁,其實未必㗎,得兩個人,影嚟影去咪又係得攬下鍚下咁,多一個人就唔同呢,多好多玩法㗎嘛!

美國呢對新人,就決定搵個「第三者」嚟同佢哋影相。呢個人就係新郎哥最好嘅朋友,亦即係伴郎喇!古乳有暈,能成為密友大概總帶著愛。話晒同新郎咁多年朋友,相信佢哋嘅感(基)情一定好深厚⋯⋯

圖片來源:Country Roads Photography

簡直深厚到想咀新郎一啖呀!當新郎同新娘喺度咀咀嘅時候,伴郎只能夠默默咁嘟長個咀仔喺側邊做個電燈膽咋⋯⋯最重要都係鞋底上面嘅心聲,當新娘講「我願意」嗰陣,伴郎心入面其實係講緊「我唔制呀~」!

圖片來源:Country Roads Photography

嗚⋯⋯「新郎結婚了,伴郎仲要係我」,仲慘過自己個前度請飲呀!新娘仲要喺隻鞋度宣示主權話自己贏咗呀!人哋已經好傷心㗎啦,要望住你哋放閃,你仲咁講嘢,抵畀人叫你收聲嘅。

不過伴郎哥,你都唔好咁傷心啦,仔死仔還在吖嘛。呢輯相放咗上網之後,大家都話伴郎好可愛,仲有勁多仔仔女女問佢係咪仲單身,想識下佢咁話呀。

圖片來源:Bree Orchard

你哋全部都諗多咗喇,其實呢個只係影相效果嚟㗎咋,伴郎哥唔止唔係hehe,仲已經名草有主,有個靚女女朋友㗎喇!女朋友見大家咁踴躍,仲特登喺FB留言表明身份,叫大家諗都唔好諗住同佢爭仔𠻹啵!

唔知換轉係一個毒L幫女神影啲咁嘅結婚相,又會唔會有咁多仔仔女女想識佢呢下?

 

封面圖片及資料來源:Country Roads Photography、Bree Orchard​

毛記電視網站 · 版權所有 · 不得轉載 Copyright © TVMOST.COM.HK All rights reserved