【包唔過期】睇真啲先知間便利店賣嘅全部都係不織布公仔

細細個同隔籬屋珠女玩煮飯仔嗰陣,啲玩具玩嚟玩去都係得嗰幾樣嘢,如果有成間舖頭咁大嘅地方,上面擺嘅全部都係玩具嘢食,可以將自己鍾意嘅嘢食掉晒落架購物車仔度,你話係咪玩得爽好多先!

大個咗雖然可以去超市買嘢啫,但係個感覺同玩玩具始終有啲唔同嘅~況且我哋係支持「不要玩食物」嘅乖孩子嚟㗎嘛。好似係。

圖片來源:Hi fructose

嘩,呢間便利店望落又幾多嘢買喎,存貨仲幾充足𠻹!買包薯片食下先~

圖片來源:Hi fructose

咦,咁輕嘅?就算空氣多都冇理由咁離譜㗎?原來呢間便利店賣嘅唔係真嘅嘢食,係用不織布整出嚟嘅手工藝品呀!

圖片來源:Hi fructose

圖片來源:Hi fructose

除咗薯片之外,茄汁、粟米片、罐頭、麵包⋯⋯總之你諗到喺便利店度買到嘅嘢都有得買!(當然有埋廁紙啦,55。)

圖片來源:Hi fructose

就連Pizza都有呀!真係見到都想買返件食呀!

圖片來源:Sew Your Soul

呢個便利店嘅每一件商品都係由英國一個叫Lucy Sparrow嘅藝術家整㗎。佢喺兩年前就做過一個類似嘅展覽叫「Corner Shop」。不過今次呢個喺紐約嘅展覽就再大型啲,佢話呢間喺地牢嘅便利店就好似噏耷版嘅7仔咁喎。

圖片來源:Hi fructose

點噏耷法呀?佢話連桶污糟水入面嘅死老鼠同埋烏蠅拍上面啲烏蠅都整埋出嚟呀!點解聽完反而仲想見識下咁嘅?

圖片來源:Hi fructose

圖片來源:Hi fructose

圖片來源:Lucy Sparrow

雖然話係藝術品,但係絕對唔係眼看手勿動咁冇癮㗎~喺呢間便利店見到嘅嘢,全部都真係有得賣㗎!不過價錢就梗係貴過平日見到嗰啲真商品好多啦,話晒件件都係Handmade㗎喎。唔知佢哋收銀機下面個貨架啲嘢係咪同香港一樣,有咁多隻味揀㗎呢?毛毛講緊香口膠咋嘛,你諗咗去邊呀!

 

 

 

封面圖片及資料來源:Hi fructoseSew Your Soul Lucy Sparrow

毛記電視網站 · 版權所有 · 不得轉載 Copyright © TVMOST.COM.HK All rights reserved