之前考過大家一堆冷門卡通人物嘅名，睇你哋留啲cm，勾起晒毛毛啲童年回憶呀！所以毛毛今次加碼，搵返一堆同一間公司出品嘅卡通公仔，同大家認下當年用人氣搶晒我哋啲零用錢嘅犯人呀！
烘燶麵包
仲記唔記得呢個木口木面嘅包呀？佢背後有個好悲慘嘅故事㗎⋯⋯人哋本來係個優質靚紅豆包嚟㗎嘛，點知因為一次意外烘燶咗，變咗賣剩包呀陰功！
雖然佢個故仔好慘，但係反而令佢喺香港好受歡迎㗎！嗰陣聽啲朋友仔講，最鍾意係佢成日諗計扮返做個靚包呢份毅力同嗰啲搞笑嘅舉動喎～
趴地熊
嗚⋯⋯你哋班貪新忘舊嘅人⋯⋯淨係識鬆弛熊同梳乎蛋得啦？講懶，趴地熊可以話係懶系卡通公仔嘅始祖呀！呢隻扁踢踢、軟綿綿嘅熊貓仔，唔多鍾意講嘢，熊如其名就係鍾意趴喺度⋯⋯
點解咁得人鍾意？因為每個人最大嘅願望咪臭係可以懶下囉⋯⋯
黑白豬
呢個簡直係毒L最痛嘅回憶呀！是咁的，話說呢兩隻豬其實係一男一女，所以當年好多情侶都會一人一隻咁掛住，仲要黑豬白豬咁叫對方，夠喇！你哋有冇諗過毛毛唔想聽呀！每次行過文具舖見到黑白豬，就好似嘲笑緊毛毛永遠唔會有人同我一人掛一隻咁呀⋯⋯
點心貓
叫點心貓真係好似唔多準確，因為呢隻貓貓好叻豬㗎，扮咩嘢食都得，點止扮點心吖，扮漢堡又得，扮壽司又得，得咗！嗰陣佢仲出咗好多可以換衫嘅扭蛋、公仔，可以將隻白色貓貓塞落唔同嘅食物衫度?㗎！當年毛毛就係食少咗好多點心嚟奉獻啲零用錢畀點心貓⋯⋯
爆炸狗
當年呢隻狗狗又係唔知點解咁紅㗎，啲妹豬又要話佢樣衰，但又要爭住買嚟玩喎，出啲玩具同點心貓差唔多，最主要嘅玩法都係掹佢個爆炸頭出嚟，換做其他髮型囉～毛毛想當年都好似有過一隻㗎，但係最後玩到佢個假髮唔見埋呀⋯⋯
栗子人／甘栗小子
講起食，呢間公司都幾鍾意將啲食物變做卡通公仔㗎喎，好似呢粒粟子人咁，有段時間成日見到學校啲女同學買佢啲精品文具，仲好開心咁喺度話佢個殻除得出嚟㗎！其實毛毛件衫都除得出嚟啫，點解冇女同學對我有興趣㗎呢？
蜜柑人／蜜柑小子
其實佢望落個樣咪又係同栗子人差唔多，喺個蜜柑上面加返一樣嘅眼耳口鼻啫⋯⋯
不過後尾先知原來除咗蜜柑仲有檸檬、柚子同其他角色㗎！同埋點解望落同栗子人咁似，原來係因為佢哋都係出自鬆弛熊嘅作者手筆！唔怪得而家唔得閒畫返呢兩隻角色喇⋯⋯淨係畫一隻鬆弛熊都夠搵啦！
芝士家族
現實世界都有咁多款芝士，咁卡通入面嘅芝士有成個家族都好合理啫～不過以毛毛當時嘅智慧，除咗芝士阿爸阿媽同粒BB芝士，幾乎完全分唔到邊隻打邊隻呀！
其實點解要停出呢款卡通公仔呢？而家啲人咁鍾意芝士拉絲，如果出返呢隻公仔一定好好賣啫！
啤酒人／啤酒小子
嗱嗱嗱，根據政府「未成年咪掂酒精」呢個偉論，呢隻嘢應該要十八禁啦！居然畀我哋啲咁天真無邪嘅小朋友咁細個就接觸啤酒喎！仲要整到佢咁可愛，分明係引人犯罪㗎啫！
優柔貓
呢隻貓相對其他卡通人物，好似好神秘咁，唔係好知佢個背景，但係因為佢畫風有日本特色，加埋個感覺好有詩意，所以當年都有好多少女捧場㗎。
其實呢間公司出過嘅卡通人物又點止咁少吖？不過近年佢哋好似主力捧角落生物同鬆弛熊，同埋keep住出新角色，所以都好少見到上面講過呢堆卡通公仔出嘅精品喇，唯有摷下櫃桶底，睇下執屋嗰陣有冇留返佢哋啲嘢喺度啦⋯⋯
封面圖片及資料來源：Greencamel、こげぱん、紀伊國屋書店、Gothics Love音樂論壇、Guirky、desuu-ka.／Tumblr、San-x官方網頁、優異論壇、Yahoo! Blog Japan
