細個總係有好多嘢唔想做，但係阿爸阿媽又好想你去做⋯⋯做功課、溫書、補習、上興趣班⋯⋯有時都有諗過離家出走，咁咪可以日日去玩又唔使畀人管住晒囉！不過一個細路走得去邊吖，咪又係匿埋牀下底或者衣櫃入面唔肯出嚟咁囉！

所以話，你哋呢啲咪冇志氣囉，係匿就匿遠啲，唔好咁易畀人搵到吖嘛！好似美國呢個叫Angel嘅弟弟咁，明明一直喺屋企範圍內都冇人搵到佢呀！

你冇眼花呀！佢真係匿咗上屋頂呀！弟弟你點上去㗎？莫非你就係傳說中嘅「亨」功水上飄？你叫Angel啫，唔會真係有翼識飛啩？唔講佢點爬上去先，但係佢呢一爬，唔好話阿爸阿媽，就連警察都搵佢唔到呀！

咁究竟係邊個咁天才發現到佢呢？原來係記者坐直升機去報導，先咁啱見到佢喺屋頂咋！如果咁啱啲記者係搭採訪車去，咁就真係冇人搵到佢喇。

事後警察叔叔都勸得返Angel落嚟嘅，問返佢先知原來佢唔想入夏令營，搞到同阿媽嗌咗交，所以咪走咗上屋頂囉，點解要上屋頂唔去其他地方？佢話自己嗰陣都唔知諗緊咩喎。

其實事後Angel弟弟都知衰㗎喇，話晒嚇到阿媽鼻哥窿都冇肉呀！同埋阿媽話Angel自己都唔想搞成咁㗎，係因為Angel有ADHD（專注力失調及過度活躍症），所以有時會控制唔到自己做嘅嘢囉，弟弟話下次唔敢喇喎。希望係啦下⋯⋯唔係你下次玩爬入屋底嘅話，都唔知點搵返你出嚟呀！

封面圖片及資料來源：7News Miami、Aol