【CNN新聞報導】你開記招唔畀人影相 咁我咪畫出嚟囉

聽講政治人物開親記者會都好容易瀨嘢?梗係啦,而家搞親咩都話要直播,講錯嘢又直接出街喎!嗱,如果冇直播、冇錄影、冇錄音,咁咪講錯咩都唔使驚囉?喂係咪好橋先?

吖,唔知係咪侵侵都覺得呢個諗法好呢,自從佢上咗任之後,就多咗好多新聞發佈會話唔畀錄影,就連影相都唔得喎!唉,不過記者除咗講聲「你咁樣我好難做㗎喎」之外仲可以點吖?

圖片來源:CNN/Twitter

你有張良計,就我有過牆梯。乜你以為咁就難到專業嘅傳媒喇咩?你唔畀我影,咁我咪畫囉!呢幅畫得咁神似嘅素描,就係CNN特登請法庭畫家喺現場幫佢哋畫㗎喇!

圖片來源:CNN/Twitter

圖片來源:CNN/Twitter

話晒喺法庭畫開喎,區區一個記招又點會難到佢吖?你睇下,用簡潔嘅筆劃同線條就將成個情況記錄低,仲可以清楚見到發言人啲動作表情𠻹!連有邊個舉手問問題有畫低㗎!

圖片來源:CNN Media

圖片來源:CNN Media

啲圖上埋顏色之後,似足教科書插圖咁呀!老老竇竇,咁都畀佢哋諗到呢條橋,係有創意嘅!但毛毛硬係覺得呢條橋咁熟口面嘅?

圖片來源:電影《九品芝麻官》截圖

吖,係喺《九品芝麻官》入面見過呀!肯肯定CNN有膠層係星爺Fans,所以諗到條咁絕嘅橋啫,55!

 

 

 

封面圖片及資料來源: CNN MediaCNN/Twitter

毛記電視網站 · 版權所有 · 不得轉載 Copyright © TVMOST.COM.HK All rights reserved