【絕世好爸】呢輯由老竇親自操刀嘅BB相會唔會太Cute?

唔好畀阿爸湊仔女,呢句說話大家都聽得多喇~因為老竇嘅創作力量同幻想,成日都嚇阿媽一跳囉~如果畀阿媽睇到啲阿爸點同仔女玩,通常有兩個可能,一係就激到阿媽暈低,一係就激到阿媽打到老竇暈低⋯⋯

其實又未必嘅~有好多好有創意嘅阿爸同仔女玩啲嘢,連阿媽睇到都會好冧好開心㗎!

圖片來源:Boredpanda

美國呢個阿爸就係運用咗佢嘅創意,同佢9個月大嘅BB女影咗勁多得意相喇!好似呢幅淋花相咁~老竇用咁多愛心嚟種呢朵寶貝小花,呢棵花一定茁壯成長啫~

圖片來源: Boredpanda

「老竇,畀下面呀,阿媽話再食牛肉乾就罰我冇得食糊仔㗎喇~」

圖片來源:Boredpanda

哦!老竇你壞壞喇!你係咪睇得多Breaking Bad呀?居然學人製毒?咦,唔係啵,原來係BB製造緊毒氣畀爸爸聞至真!唔怪得老竇要帶定防毒面罩啦!

圖片來源:Boredpanda

「老竇,你嗰兩個椰子想點呀⋯⋯好硬呀⋯⋯」

圖片來源:Boredpanda

嗱嗱嗱,雖然都係洗啫,但洗身唔係用洗衣粉㗎啵老竇!連B女都睇到皺晒眉頭喇!千祈唔好畀阿媽睇到呢張相𠻹呀⋯⋯唔係佢又會好似美冴咁咆哮㗎喇!

圖片來源:Boredpanda

殊⋯⋯細聲啲呀!唔好畀辛巴發現呀!唔係就拍唔到獅子王2046㗎喇!

圖片來源:Boredpanda

老竇喺B女咁細個就培養佢啲藝術細胞,一齊做街頭藝術,大個咪可以做《Art Attack》主持?呢個生涯規劃有錢途喎!

圖片來源:Boredpanda

睇完呢堆相~係咪覺得其實畀老竇湊仔女都唔係咁災難呢(好似係)?其他老竇學下嘢喇,得閒幫輕下老婆湊仔,影多啲靚相,咁老婆見到啲打耳相,自然心情就會好啦~記住老婆心情如何,你的日子也必如何呀!

 

封面圖片及資料來源:Boredpanda

毛記電視網站 · 版權所有 · 不得轉載 Copyright © TVMOST.COM.HK All rights reserved