上星期，一班九巴車長因為不滿公司一直無正視車長人工低、工時長、長期唔夠人手嘅問題，只係提出一個所謂嘅「薪金優化方案」，即係將本來車長可以拎到嘅獎金，加返入底薪度，最後車長其實係一蚊都無拎多到。

所以，本身係九巴車長嘅葉蔚琳，就同一班車長喺WhatsApp group度，自發組識咗「月薪車長大聯盟」，上星期六晚發動巴士罷駛，希望公司可以正視一直以嚟嘅問題。

從來無諗過自己會企到咁前，從來無諗過自己係車長但又唔去開車，葉蔚琳話，就算今次係螳臂擋車，佢都唔驚，因為呢個就係要做嘅事！