XX眾生相

唔知典解，年年啲老師都好鍾意叫人寫眾生相，「茶樓眾生相」、「沙灘眾生相」、「地鐵眾生相」……大佬呀，不如Update啲啦個人，而家邊有人睇眾生相，係都睇Facebook大圍相啦！

XXX的所見所聞

可能係因為啲先生長期困喺學校，冇乜機會出去見吓世面，所以要靠我哋講返佢知啩，例如乜乜乜「在醫院的所見所聞」、「一次出國旅遊的所見所聞」咁，但佢知唔知其實我都係成日困住喺啲書度根本冇見聞㗎啫？

XXXX有感

下下都要迫人哋有感，探病又要有感、溫書又要有感、遲到又要有感，邊得嚟咁多感喎？你話我係啲治癒系作家咁情感泛濫就話啫，一係畀啲流感你囉，啱唔啱使呀？

XXX的自述

咩「書本的自述」、咩「水的自述」……家陣啲高官月入19幾萬都唔使講嘢，淨係棟喺度就un un腳等出糧，做人邊使識自述㗎，識得做人肉錄音機複述咪得囉！

「XXXXXX」試談談你的看法

喂，你會唔會要我寫完照稿讀再錄影放上網㗎？唔好坤9我喎！你係咪廣西嗰邊㗎？我好似喺報紙度見過你喎！

「XXXX，XXXX」，你認同嗎？

同上面嘅題一樣嘅，換咗字眼之嘛，你唔好以為我睇唔出呀。

中學生不應談戀愛

咁小學係咪應該要結定婚先呀？你老X！仲將60年代嘅社會問題，放返喺2015年問？

喂喂喂，其實都隔咗咁耐，到而家先至發現啲作文題咁多年嚟都係「看似很有意義，其實不切實際」，你哋出卷嗰班友仔，做人Update啲、生性啲啦好嘛？唔好成日激到班考生嘔血啦……

唉，不如出卷嘅友仔，考返個「出試題」嘅考試，合格咗先出嚟獻世啦好冇？