每個人都有個格，例如689係衰格、潮人栢豪係型格、趙薇係還珠格格，而青靚白凈眉清目秀嘅馬浚偉偏偏係小三格。嗱，我有證據㗎，我對眼就係證據！（呢句夠唔夠CCTVB啲八婆腔呀？）高登巴/絲打「超級派膠王」、「冇頭騎士」等發現佢喺劇集裡面，拆散過超過10 對情侶咁多，真係名符其實嘅「拆散專家」，而家等我慢慢數幾個經典嘅過你聽！

《十月初五的月光》（2000）拆散：張智霖、佘詩曼

明明初哥哥同祝君好應該係一對㗎嘛！偏偏司徒禮信（即係馬仔）就插隻腳入去，仲要同君好結埋婚，喂你要搞就搞條毛巾，唔好搞散人哋吖嘛。
 

《鐵血保鏢》（2006）拆散：梁烈唯、姚子羚

劇集入面姚子羚同梁烈唯係對有名無實嘅夫妻，但假假地都算係拜過堂，而馬仔今次唔止係撬牆腳，直情係畀綠帽唯唯戴，55，試落都幾啱身。
 

《突圍行動》（2007）拆散：馬國明、廖碧兒

喺一段關係入面，兩男一女得個「嬲」字，總有一個要退出。而本來係廖碧兒正印嘅馬明BB就畀呀馬仔拆散，唯有自己喺一邊流馬尿囉！

《金石良緣》（2008）拆散：胡麒豐、鍾嘉欣

事先聲明，而我不知道胡麒豐是誰。根據大台劇情潛規則規定，第一男主角必然係要同第一女主角一齊㗎，所以，馬仔今次嘅介入係絕對合情合理合法！
 

《碧血鹽梟》（2009）拆散：黃浩然、楊怡

馬仔今次真係幫唔落喇，同黃浩然Friend到稱兄道弟，點知就朋友妻即刻窺，搶咗羊兒返嚟。其實都冇乜特別大驚喜嘅，最緊要係佢個馬鼻有冇事啫……
 

《蒲松齡》（2010）拆散：陳錦鴻、鍾嘉欣

馬仔做主角蒲松齡，有囡梗係食啦，使問過你呀？

《隔離七日情》（2011）拆散：黃宗澤、郭羨妮

馬仔經常可以成功撬牆腳，點都有返幾招絕招袋喺身嘅。你睇佢幾年前就已經識壁咚，抵佢撬贏啦！
 

《當旺爸爸》（2012）拆散：黎諾懿、鍾嘉欣

大台潛規則：二線又點同一線鬥呢？傻豬嚟嘅。
 

《守業者》（2014）拆散：曹永廉、楊怡

撬完未呀？喂？好L悶呀喂！

根據毛孩估計，下齣、下下齣、下下下齣……只要有馬浚偉做嘅劇，99.9%佢都會係小三（除非唔係），如果女主角係嘉欣BB嘅話，就肯肯定係100%嘞！早啲過嚟毛記電視咪好囉，到最多畀你做下小二，咁咪唔使再做小三囉！

資料來源：http://goo.gl/iP5Sza