道歉、講「對唔住」，看似簡單，其實好難。難就難在：幾時講、點樣講、講啲咩、點講法......不過呢啲都係碎料！毛孩今日就教大家「道歉方程式」，睇住名人道歉學道歉！

第一法則：真摯嘅態度

2011年，那英微博講笑「炫耀」警車開路攞演出服，網民嬲爆狂插。佢立即刪post道歉，仲話「大家對我的批評我誠懇接受，絕不逃避。」

毛點評：呢個係成功嘅道歉，用直率、真摯嘅態度認錯，即時令民意反彈再加網民激讚！

2014年，九把刀偷食，一邊向公眾道歉，一邊教公眾感情係私人領域。

毛點評：「私人領域」嘅潛台詞即係「唔關你事」，講得呢句說話嘅人，一邊耍冧一邊鬧返人轉頭。

1999年，成龍為有婚外情道歉：「我只係犯咗全天下男人都會犯嘅錯。」

毛點評：拉晒全天下男人落水，令人覺得佢嘅錯只係小事一樁，試圖淡化輿論嘅抨擊。

第二法則：刁鑽嘅角度

2008年，陳冠希為「艷照門」所造成嘅傷害向相關女士道歉。

毛點評：佢喺認錯嘅時候再同時話你知，錯嗰個係其實唔係佢，而係將啲相流出去嘅人，完美地卸膊。

2008年，性工作者Ashley Dupre為美國紐約前州長Spitzer召妓一事向斯皮策太太道歉。

毛點評：其實Ashley Dupre唔使道歉，但佢咁做就令大家對佢非常有好感，上哂位！

2004年，美國記錄片導演Michael Moore喺記錄片《華氏911》將布殊比喻做逃兵而道歉，「我願意為將布殊比作逃兵道歉。但我想講，布殊就係一個逃兵、選舉小偷、騙子和文盲！」

毛點評：刁鑽在於以退為進，敢言嘅形象更加為佢戴上光環。

第三法則：低微嘅姿態

1977年，英國著名主持人David Foster問美國前總統尼克遜要唔要為1972年水門案濫用職權道歉，佢就好順攤咁對住鏡頭道咗歉啦。

毛點評：有下台階畀你，就要低住頭落，抬高頭小心叉錯腳！

2009年，Tiger Woods為婚外情開記者會道歉，高姿態讀稿，讀完就走。

毛點評：唔畀人問問題呢啲咁囂張嘅行為，結果就係令記者插多佢兩嘢。

韓虹連續三次挪用其他人嘅車牌，畀網民喪批評，佢就答「你睇到我嘅錯，但完全唔記得我嘅功。」

毛點評：以為可以攞成就、功勞嚟換網民原諒，唔通你做特首就可以貪污咩？唔得㗎嘛！

第四法則：堅定嘅行動

1995年，美國名演員Hugh Grant因召妓被捕，即時而且主動咁現身道歉：「我做錯事，呢個係我應得嘅報應。」

毛點評：由事發起就主動協助警察調查，認罪態度良好，至少可以攞同情分。

2009年，有個黑人教授冇鎖匙就想爬返屋企，結果畀白人警官拉咗，奧巴馬批評警官小題大做，結果要擺和頭酒道歉。

毛點評：道歉之後再同對方啤一啤，行動搭救。

2014年，台灣名廚阿基師為代言品牌係黑心食品下跪道歉！然後問廠商「你哋瞓得著咩？」

毛點評：睇嚟講「你哋冇做錯到！」嗰條友真係要學下嘢喇。