香港政府廣告嘅宣傳策略，原來唔係「一定要得」，而係「一咪靠嚇」！毛孩唔知癡起邊條筋，走去睇返政府以前啲廣告，嘩！唔睇由自可，一睇就嚇到出火，驚嚇程度達10級！有心臟病或者心血太少嘅朋友，慎入呢篇文。

祝我生日快樂

除咗岩布仙尼之外，原來仲有一段祝自己生日快樂嘅片，不過呢段其實係講唔好獨留細路喺屋企嘅。可能少年你太年輕，未睇過。你想像吓，喺你面前有一個蛋糕，上面插住枝蠟燭，但係後面有對父母喊到好似死老竇咁，加埋把空洞得嚟又帶少少悲傷嘅細路歌聲，你都咪話唔心寒，嚇到我要即刻華麗轉台！（連結：https://youtu.be/9qM8-RurUGo）

游水見紅

呢個廣告係叫人游水嗰陣，要注意安全。游游吓水，見血喎，唔係M到囉，係畀針插！我望住支針插入去嗰下，真係忍唔住講句：「師傅，好很痛呀！」不過，不幸之中嘅大幸係，好彩插到嘅，係隻腳咋，如果係……（連結：https://youtu.be/dl3dc-IyhQY）

死唔眼閉

喂，畀啲心理準備我先得唔得呀？想叫人唔好高空擲物啫，唔使段片一開波就死人，仲要對眼擘到大一大咁望住我㗎？睇完之後我係唔敢高空擲物，但我都怕咗啲低胸放電嘅囡囡囉！嗚呀！（連結：https://youtu.be/DHrWNNJVnGM）

車毀人亡

膠官成日話車毀人亡，佢哋今次又冇講大話喎，成架車一嘢轟落去，阿婆同個細路就喺半空一個轉身360度再直插返落地，不過呢條廣告播之前，應該要加返句「以下情節可能引起不安，敬請家長留意」先啦！（連結：https://youtu.be/3Ww1gVA-l0U）

那雙眼駭人

呢條片係雖然係叫人唔好疏忽照顧兒童，但係成條片黑媽媽，淨係見到條長走廊同藍燈，加埋金像獎級嘅聲效，唔講我仲以為自己睇緊鬼片。跟住突然有個長髮白衫女人出現……不過最後靜悄悄喺條罅度望住你嗰對眼，應該就係嚇到唔少細路怕咗政府嘅原因（應該係）。（連結：https://youtu.be/mi7W7swLFYo?list=PLE9EF75EF0CEECF7B）

一定要得……個桔

不過驚嚇呢家嘢，最高層次笨唔係流於畫面上嘅恐怖，而係意識上！由「有商有量」變成「袋住先」，再變成「一定要得」，呢個廣告先至係最驚嚇呀！嚇到斯文囡囡都唔小心舉咗隻中指呀陰公豬！