最近有位叫Kiu Wa Lam 嘅網民，上載咗一段的士司機大戰巴士司機嘅片，毛孩其實唔係好聽得到啲對話內容（除咗大量俚語），總之就係話個的士大佬走咗上架巴士度鬧個巴士司機嗰陣，個巴士司機就照繼續開車……邊個唔啱邊個唔著都好，其實佢哋兩個都犯咗法，拉得（好似係）。

的士大佬衰邊瓣：

大隻擋

逐格睇：一開始的士大佬就用強勁嘅臂彎去阻擋車門，學蔣元秋話齋：好Man。

懷疑違反條例及罰則：《公共巴士服務規例》第13a條－－不適當地干擾車門，可罰三千蚊同監禁六個月。

同司機搭訕

逐格睇：的士大佬千辛萬苦上到巴士，然後同巴士司機進行學術性俚語膠流討論。

懷疑違反條例及罰則：《公共巴士服務規例》第13a條－－故意阻礙或妨礙巴士司機或任何獲授權的人，或故意分散他們的注意力，可罰三千蚊同監禁六個月。

冇畀車錢

逐格睇：巴士司機叫的士大佬畀車錢，而佢又真係拎個銀包出嚟嘟喎，之但係，毛孩校到個喇叭最大，豎起晒隻耳仔，都係聽唔到「嘟」一聲囉！

懷疑違反條例及罰則：《盜竊罪條例》第18C條，可監禁3年。

超越黃線

逐格睇：我都明白面對面見埋樣咁傾計先可以增進彼此嘅感情，所以的士大佬一路都係企喺黃線外面，保持優質通話！

懷疑違反條例及罰則：《公共巴士服務規例》第13a條－－巴士移動時，乘客不得在以下地方站立─ (c) 前於單層巴士或雙層巴士下層司機位最後部分，違者可罰三千蚊同監禁六個月。

大講俚語

逐格睇：的士大佬嘅俚語有如行雲流水，冇返幾廿年修煉都冇咁嘅功力，毛孩今次真係小毛見大毛喇！

懷疑違反條例及罰則：《道路交通（公共服務車輛）規例》374D章36條－－不得使用不良或冒犯性的語言或作出不守規矩的行為，可判罰三千元同監禁半年。

巴士司機衰邊瓣：

門常開

逐格睇：雖然阿的士大佬一開始係擋住咗道門，閂唔到，不過可能個巴士司機都真係想西篩佢落車啦，之後都係繼續開住門咁開車！

懷疑違反條例及罰則：不小心駕駛，可罰款5,000元及監禁半年。

同乘客吹水

逐格睇：本身如果淨係得個的士大佬喺度自己一條友大鬧天宮咁，就冇事嘅，點知個巴士司機又抵唔住頸沉唔住氣，走走駁咀喎，咁咪衰豬咗囉！

懷疑違反條例及罰則：《公共巴士服務規例》第12條－－ 不得在該巴士行駛時與人談話，可罰兩千大元。

不過，的士司機衰還衰，佢有一樣嘢好抵讚嘅，就係佢由巴士開車嗰刻就一直緊握扶手！

（圖片及片段來源：Kiu Wa Lam Facebook 影片截圖）