早兩日有個港女喺網上話佢條仔抽中公屋，變得好囂屎喎。毛孩覺得呢位港男冇做錯到！住公屋，的確囂得起，至少你都叫有個安樂窩先呀，不過其實仲有其他原因嘅：

囂張位1：免費召喚服務（維修）

平時層樓有咩甩漏，正常都要畀錢先有得維修。但係住公屋就唔同嘞，有需要就call 218……呀唔係，打返個電話召喚房署，就會有人喺24小時內上門檢查，兩日完成維修，錢都唔使畀。而每隔5年仲會有職員主動送上門，我指上門檢查維修。

囂張位2：免費上網

全港嘅公屋大廈大堂都有免費Wi-Fi，想上甜網又驚畀阿媽發現嘅話，可以落去上返夠本，分分鐘仲可以同個看更些牙下㗎，總之就晚晚都可以有免費娛樂啦！

囂張位3：管理費都慳返

就以新盤「緻藍天」為例，一個680呎左右嘅單位，管理費講緊大約2244蚊。而根據房署嘅資料，公屋每月平均租金不過係1,703蚊，畀少少錢，就已經搞掂！
（參考資料：明報《15萬呎會所 管理費3.3元》）

囂張位4：按金優惠

大家都係租屋，大家都係要畀按金，但住公屋嘅就可以畀少好多！即係點？嗱，按金呢就分兩種嘅：

1. 租金按金：金額通常係1-2個月嘅租金。不過公屋住戶淨係畀一個月嘅價。

2. 水電煤按金：當私人樓逐呎逐呎同你計條數嘅時候，公屋住戶只係需要畀500蚊咋！

囂張位5：直情連租都唔使畀

財政預算案係公屋住戶年度盛事，由08年開始，每年有1-2個月係唔使交租嘅，即係白住！私樓幾時免租過？可能我記性唔好啦，我好似諗唔到。

囂張位6：隨時快過你上車

公屋住戶可以抽綠表買二手居屋，當你仲戇居居愁緊唔知幾時上到車嘅時候，分分鐘佢哋已經On居上咗車喇！

參考來源：beautyexchange