古語有云：人老咗就鍾意回憶往事，所以毛孩唔會怪各位毒者追返大台煲神劇。之但係往事通常都係不堪回首！就好似以下呢幾齣膠劇咁！

1969年《錄音機情殺案》

簡介：懶高深玩食腦偵探單元劇。

膠位：要用腦先睇得明（你明知C9睇劇唔用腦㗎嘛，仲要佢諗嘢？）

毛點評：我自問摩擦力好很強㗎，重播嘅話我一定追嚟睇吓我睇唔睇得明（講住先）！

1974年《烏龍劍客》

簡介：表面係武俠劇，說穿了咪又係兜兜轉轉情情搭搭愛情劇！大概係講一個唔識武功但扮晒識嘅傻書生，同一個識武功又扮晒唔識嘅捕頭女行走江湖啦。

膠位：傻書生扮大俠有一把大到要加轆先拖得郁嘅陰陽劍，不過都係扮啫，又唔使打真軍嘅，幾大轆都得！

毛點評：我真係好想見識吓嗰碌，呀唔係，係嗰條好長嘅巨劍！

1978年《師姐出馬》

簡介：無厘頭得啖笑，女主角係一個成日扮嘢嘅烏龍警察（呢個角色設定其實幾好），重點係夏蕙BB做大毒犯！

膠位：成隊慈母一字排開散步、談心，係開心豬嘅。

毛點評：舊時啲劇好興搞笑當烏龍，三個字講晒：好L悶呀頂！

1980年《歡樂群英》

簡介：估你唔到，成個名咁歡樂，原來係改編自古龍同名小說嘅武俠劇。

膠位：用返《歡樂今宵》嘅班底就搞掂，食字食到咁，其實搵《歡樂滿東華》嗰啲都得㗎喎！吳剛師傅幾ok㗎！

毛點評：應該點都會好過《今晚睇李》啲爛Gag啩！畀住首主題曲大家重溫吓先喇：

1980年《發現灣》

簡介：又係查案，類金田一偵探劇，值得留意嘅係呢段惡魔童謠：「月光光，照地堂，巫家有隻大豺狼，狼夾兇，冇陰功……」

膠位：疑似大台處女下海——抄劇嘅始祖，你睇吓個膠人頭造型同日本嗰個，係99%相似㗎！

毛點評：估唔到原來大台都有預言神劇，喺80年代就已經預測到有隻惡狼！

1981年《逐個捉》

簡介：講一班唔識嘅人為咗名/利/尋仇，而一齊去搵有錢電影大亨(石堅 演)幫手。點知佢哋一齊流落荒島……簡單嚟講即係恩怨情仇式嘅鬧劇。

膠位：兩日死一個人，但石堅仲可以繼續講「冇事冇事，繼續跳舞」，呀，啲人又堅係當咩事都冇喎。（唔通王征跳馬舞就係受石堅啟發？）

毛點評：講多無謂，自己睇下面條片啦：http://goo.gl/iPOaUb

1983年《鬼咁夠運》

簡介：將親情、友情、愛情、人鬼豬情……炒埋一碟，好有情！

膠位：個主角有仇唔報，反而走去隊冧自己個friend，好難捉摸呀！

毛點評：毛孩當年條毛都未出世，冇機會睇到，我諗，係我鬼咁夠運多啲。