有冇覺得睇迪迪尼嘅動畫，成日都有種似曾相識嘅感覺？我唔係講緊王子一定同公主喺城堡從此過住幸福快樂嘅生活嗰啲呀，我係講佢哋啲人物動作呀！有外國網友發現佢哋嘅動畫原來暗藏玄機、環環相扣，好多齣嘅驚險情節、場景，以至到用嘅道具都係好似樣㗎。
動畫：1959年《睡公主》、1991年《美女與野獸》
毛孩懷疑佢哋應該係喺同一個Ball Room度開舞會，你睇，啲格仔地板一樣嘅，係打燈效果唔同啫！另外仲有一堆二打六圍觀男女主角跳舞囉！不過有一股好強嘅摩擦力話畀毛孩知，呢兩場舞會係有唔同㗎！隔咗32年之後，啲二打六終於有樣喇！
動畫：1937年《白雪公主》、1973年《羅賓漢》
白雪公主同瑪麗安小姐笑起上嚟，條頸嘅角度同拍手嘅動作有99.9999%相似。但係毛孩覺得最殺食嘅係佢哋嗰對高潮眼囉，嘻嘻！
動畫：1937年《白雪公主》、1973年《羅賓漢》
再睇佢兩個嘅舞姿，一樣㗎。可能係同一個排舞師啩。不過又其實跳舞嚟嚟去去唔係揈頭就係揈手㗎啦，明嘅明嘅。
動畫：1967年《森林王子》、1973年《羅賓漢》
佢哋跳舞嘅動作、表情、樣貌都一樣，我有理由相信佢根本就係同一隻嘢嚟！咪以為改咗名整咗容我就唔認得你！身體很誠實㗎！
動畫：1970年《貓兒歷險記》、1973年《羅賓漢》
杜翠絲同瑪麗安小姐跳舞畀條仔睇嗰陣，扭身扭勢咁，真係好鬼挑逗。
喺呢一刻，毛孩有一個好嚴肅、認真嘅問題想問：
可唔可以整返段白雪公主扭身扭勢跳舞挑逗王子呀？
動畫：1949年《伊老師與小蟾蜍大歷險》、1967年《森林王子》
畀壞人追殺，逃跑是常識吧；惡有惡報也是常識吧。所以，呢啲速逃嘅場面大概都係咁，一路跑一路望返個壞人追到邊，跑到某個位，個壞人一定會畀人扑濕，仲要用一碌（同系唔同色）粗棍一嘢轟落去！
動畫：1963年《石中劍》、1967年《森林王子》
啲主角同汪星人嘅互動亦都係始終如一：畀狗撲倒、伸脷、瀨面，用手抹，嗯，但我硬係覺得佢哋似係用手將啲口水搽勻塊面多啲，好有愛！
動畫：1961年《101斑點狗》、1970年《貓兒歷險記》
為咗表現出迪迪尼啲汪星人同喵星人跑得有幾快，跟車有幾咁貼，於是成日都會有追車嘅場面出現，不過追嘅永遠都係開得最慢嘅貨車而唔係跑車，可能係因為貨車先有塊落貨板畀佢哋喺最後一秒跳上去啩。
講咗咁多，大家下次睇嗰陣，見到隻烏龜畀人追，又或者見到有隻豬仔要追架貨車，唔使緊張㗎，結局係點，你懂的。
