年輕人就係社會未來嘅棟樑，所以好多關心社會嘅老Seafood，喺名成利就之後都鍾意發表下金句點醒班廢青，手口並用貢獻社會。作為廢青界嘅XO！特別係今日劉公子講話睇少啲戲、去少啲日本就可以上車（好似係），毛孩聽完真係好受滾動，原來我都有機會成為一個偉大嘅老Seafood㗎！廢話少講，即刻跟隊拜師踏上正途啦！
劉鳴煒：「當一個人係萬五蚊月薪，你如果而家洗盡晒或者只淨低一千蚊，你願唔願意作出一啲犧牲，睇少啲戲、去少啲日本……以前我哋阿爸阿媽嘅年代冇iPhone、沒冇日本旅行嘅時候，你自然係少咗消費。」
毛點評：嗯，其實我真係廢青，係月入萬四蚊以下嘅廢青……
資料來源：Go Yeah
曹仁超：「最可悲嘅係，後生仔一心諗住買樓收租而無意創業，我建議你哋唔好畀500呎綁住青春。」
毛點評：毛孩對此深表認同，因為我哋班廢青早已放棄買樓。
資料來源：灼見名家《專訪曹仁超：年輕人，不要讓500尺綁住你的青春》
施永青 ：「『吃得苦中苦，方為人上人。』可惜，今天我們的社會不再崇尚吃苦了。年輕人只講自己的權利，連住屋也是權利。有這麼多的權利，又何需捱苦？要求政府兌現就是了。」
毛點評：施生經常喺C觀點發表偉論，告誡我哋唔好J蟹上身沉迷炒股，又話我哋淨係想買樓係冇出色……唉，唔炒股，唔通踏實打份牛工就買得起你啲樓咩呀施生。
資料來源：am730 C觀點《要投資先得有積累》(18/5/2015)
馬雲：「每一代人都有麻煩，年輕人唔應該逃避或抱怨，應該改變自己實現夢想。」
毛點評：咁唔知馬雲點睇佢集團賣假貨呢？喂！答我啦！阿里爸爸去哪兒呀喂？
資料來源：星島日報《馬雲指年輕人不應逃避麻煩》
689：「香港青年人應離開香港，發掘更多符合自己興趣的機會。」
毛點評：一向語不驚人死不休嘅689，喺去年12月直頭呼籲我哋班廢青離開香港，發展更多同自己興趣相關嘅事業，但毛孩認為689今次真誠又用心良苦，佢其實想話你知香港佢玩L晒先叫你走咋。
資料來源：明報《梁特籲港青現在起多離港發掘機會》
李嘉誠：「好多嘢事在人為，雖然有環境限制，但如果教育政策正確，香港一樣大把機會。」
毛點評：嘩！誠哥講真嘢批評教育政策，果然有錢就是任性。
羅范椒芬：「學聯等年青人不應將自己的政治目的，建築在別人痛苦身上。」
毛點評：言下之意，即係後生唔得但老咗得，唔信嘅你睇佢老闆689，就係呢方面嘅翹楚。
資料來源：香港電台《羅范椒芬：學聯與中央對話將無功而回 應有規有矩》
葉劉淑儀：「回想十多年來推行的新高中學制，號稱目標要「達致全人發展、終身學習」，每個學生都要「德智體群美」五育兼備，但這班在現今教育制度下成長的年輕人，他們的德育何在？」
毛點評：作為建制鐵娘子，孽瘤當然唔執輸要點吓年青人，佢認為而家嘅年輕人缺乏德育，做出示威等越界行為，依毛孩嘅愚見，應該係因為我哋冇做過班長。
資料來源：葉劉淑儀Facebook
唐英年：「香港冇地產霸權，年輕人應該反問自己，點解做唔到下一個李嘉誠？」
毛點評：其實係我哋班廢青始終想8號風球有得放假啫……
資料來源：文匯報《唐英年：香港無地產霸權》
