.jpg)
有超過700個家長覺都唔瞓，走去通宵排隊幫囝囝囡囡報暑期補習班，都係唔想佢哋喺悠長暑假度荒廢學業，停咗2個月冇書讀冇嘢學，進度就會嚴重落後，抓唔住大學的尾巴，趕唔上社會嘅步伐，成為廢青㗎喇！依毛孩愚見，小學先嚟補習實在太遲喇，要贏，就要夠快！
毛孩特地為各大家長設計咗一個「成功從小幹」嘅課程Package，由未識性就開始接受各種試探性訓練：
7個月：溝通學
你冇聽過「未學行先學走」咩？未識講就梗係要先識溝啦，呢個課程會特別教BB講自己嘅感受，溝通技巧好啲，大咗先有機會繼續做BB豬㗎嘛！呀，仲有，細細個識分軟硬質感都好重要（應該係）。
1歲：自主性潛能
而家啲老竇老母咁忙，返工都返咗19幾個鐘啦，邊有咁多時間湊細路先得㗎？1歲，滿月酒都擺埋，大個仔㗎喇，係時候要獨立，要識得自己沖奶、自己煮餬仔、自己去廁所……
歲半：服從性訓練
歲半起就梗係要報多元智能班啦，唔係大個冇能用點算？順便訓練吓佢嘅服從性嘛！個個阿媽都想自己個細路聽聽話話，叫佢去西就會去西，叫佢唔好佔晒啲中就即該出衝畀隻中阿媽啦！
歲半多3個月：適應班
考mock之前要有pre mock，返學前都應該要有pre 返學嘛，不過pre返學前最好有多個pre pre返學班……咁先可以早啲適應到嘛。
2歲：神數學
兩歲都未識得計數點得㗎？最簡單7乘7等於49都要識啦，報返個速學數學班，唔識揸筆都唔緊要，畀埋答案你揀，有把口答問題就得，得咗！
2歲半起：乜Q都訓
而家社會好高要求㗎，要你乜Q都識，所以細細個開始發展晒呢啲EQAQCQMQ……就啱㗎喇！
任何時間：膠際禮儀
基本社交禮儀，例如同人揸手、問候人哋嘅屋企人等等，係一定要識㗎，如果唔係就會畀人話個細路冇家教㗎喇！
呢個package是咪好豐富呢？你係錫你個細路嘅，就記得幫佢報喇，只要佢咁都讀唔死，大個就一定會成功㗎喇（應該係，除非唔係）！
資料來源: People Impact; 嬰幼兒心理發展協會; 維珍尼亞心理顧問及培訓中心;
