香港人成日都話強國遊客乜乜乜，但係有冇諗過，你其實都畀人話緊乜乜乜？乜乜乜係乜乜乜？自己睇啦，我睇到都覺得醜怪豬。

清邁跳光豬Jump

你以為個港女去清邁係玩笨豬Jump咩？佢一早plan好玩光豬Jump㗎（好似係）。一綁好安全帶，佢就施展一秒除衫法，跳咗出去。

毛孩點評：你以為唔著衫就係行為藝術呀？嗰度係泰國呀……而另外，仲有人話呢個女仔其實唔係土生土長嘅「真香港人」，而係來自內地嘅「新香港人」，所以出醜嘅仍然係蝗。

影響：人哋遊樂場個負責人，因為手腳太慢阻止唔切，毛辜辜畀泰國警方以容許他人赤裸嘅罪名拉咗喇……

（資料來源：蘋果日報）
 

一係畀著數，一係收投訴，你揀喇

香港人去旅行，搲嘢，我指搲著數就一定㗎喇（其實唔係旅行都搲），搲極都搲唔到就走去投訴，但係畀澳門人投訴返囉。

毛孩點評：搲嘢投訴一次過唔洗用EPS，面皮厚啲就得。不過畀人pot返轉頭好冇飛屎囉！

影響：全港人，包括毛孩我都被標籤做西客！

（資料來源：香港高登討論區）
 

香港人衰邊三樣？格、格、格囉！

報紙數咗6大樣各地旅客惡行，香港中咗三樣：遲check-in又要揀位，行李超重又唔肯畀錢，仲有啱啱講嘅邊搲著數邊投訴！

毛孩點評：平時返工又遲、約人又遲、連搭飛機都遲，但攞著數又唔見你遲？

影響：唔使全機人等你一個就算啦唉。

（資料來源：晴報，31/3/2014）

港客日本訂枱甩底

上年有港客喺日本民宿訂咗張四人枱，腦細整咗成枱嘢食等佢哋嚟，點知最後4個人冇咗影，但飛機就有一架！

毛孩點評：大嘥鬼！你唔去食，叫我去呀嘛！

影響：搞到香港人誠信破產，以後訂民宿要落訂喇麻Q煩！

（資料來源：蘋果日報）
 

去台灣旅行睇樓

人去旅行你去旅行，人哋去玩你就去睇樓？不過冇計啦，對香港人嚟講，上車幾時都係最重要嘅人生議題，明嘅！

毛孩點評：去玩都唔會忘記人生目標，有大志！係好事嚟嘅。

影響：減低熱門景點人流，其實都唔錯。

（資料來源：明報）