最近一單新聞話豬肉佬想改名洗底，改善形象吸引新血，引嚟唔少人恥笑。吖所以話你班友見識淺薄，喺21世紀改個名幾咁閒啫？再講遠啲，其實我哋對以下職業嘅稱呼，都隨時日渡過而變了樣：

改名成功組：

豬肉佬 >>> 肉類切割專員

收皮議員亡國興提議，將豬肉佬改名做「肉類分割技術員」，令揸刀搵食變得專業，希望吸引到新血，一齊學星爺做個風度翩翩嘅豬肉佬。

紮鐵 >>> 鋼筋屈紮工

唔知由幾時開始，紮鐵有咗呢個咁專門嘅學名，成件事少咗幾分血汗麻甩味，連毛孩都心郁郁想紮鐵呀。

飛髮佬 >>> 髮型師

話晒都係中國傳統七十二行之一，下下都嗌飛髮佬冇嚟尊重，而家正名為髮型師，閒閒哋一個洗剪吹收你二百幾，問你服未？

看更 >>> 保安

叫得做看更，平時睇報紙瞓覺打發時間是常識吧，點似得而家改名做保安仲要考牌咁麻煩，難怪樓下個保安成日西我面。

改名失敗組：

空中小姐 >>> 機艙服務員

想當年空姐係典雅時尚嘅象徵，係男人嘅慾望投射（BTW，物化女性可恥！)，但而家自貶身價叫機艙服務員，待遇差仲日日服務班麻煩客……唉，過嚟等毛孩抱抱先。

港督 >>> 特首

港督個名聽落充滿威嚴，令你都想同佢飲杯茶食蛋撻，但而家講起特首，不論老懵董、曾蔭權定689，你都只聯想起賣港賊，想餵佢食「一日含包散」。

售貨員 >>> Sell屎

唔好以為由中文轉講英文會有份白人優越感，sell屎sell屎喎，畀人感覺你想sell嘢拎著數，嗱唔係想一竹竿打一船人，不過零售業個朵真係畀啲害群之馬搞彎晒囉。

皇家香港警察 >>> Jing Cha

想當年叫皇家香港警察幾咁威風八面，回歸後少咗皇家兩隻字已經盡現頹勢，點知近日仲有警察棄Police之名自稱Jing Cha……我英文唔好想問下，係咪應該譯做「警渣」？