所謂年輕就是原罪，嚟到Fresh grad瘋狂搵工嘅月份，唔少老Seafood都撲晒出嚟話你賤過地底泥，你搵長工就X你一心求穩定冇上進心，做兼職又X你太短視甘心做廢青……好心你哋收皮啦！而家個世界唔同咗喇，我同你講，做炒散分分鐘好搵過跟你打工做奴隸呀：

夜更保安

蒲下香討同Baby Kingdom你都會發現，閒閒哋都有人出價45蚊一個鐘請夜更保安炒散，夜欄人靜行下坐下咁短炒幾日都咪話唔梳肝，要考牌都只需要上16個鐘堂，再考60條MC考張QAS優質保安証書，可謂小本搏大利。

資料來源：香港人力資源有限公司

私人補習

坊間私人補習嚟講，小學起碼時薪$100，中學$120-$150不等，去豪宅區$200時薪不是夢，唯一限制係有家長要求女導師……毛孩喺度提醒各位男士，唔好發錢寒發到為一時外快而扮女人，出事㗎。

會展炒散

相信讀書時期你都做過會展炒散，其實唔少炒散本身人頭價高達$100時薪，但畀中介公司食咗一半，不過都有成50蚊吖，計埋一日都起碼有5舊喎，梗係袋住先啦。

酒店炒散

酒店炒散長期缺人，普遍時薪都有50蚊以上，旺季人工更高。而最緊要係咩？唔使經驗呀！有手有腳有對黑皮鞋就做得，就算嫌辛苦，搵得一日得一日嘛。

神秘顧客

呢份工可謂奉旨行街！只要去指定地方視察環境，問下問題錄埋音，最後填埋份表寫感想就任務完成，一份表賺$40-$70蚊不等，仲要有交通津貼，今次真係行得快做世界。

監考員

你冇睇錯，你勢估唔到你會再入考場，不過而家係坐喺度Un un腳收錢睇人考試！考評局有好多公開試要搵人監考，只要你密切留意佢第一水請人時去應徵，懶惰嘅佢之後有咩監考都會搵返你，以SAT考試為例，入到亞洲國際博覽館監考可以賺到$684，車程遠又有津貼，飛雲，機會嚟喇！

哈囉喂扮鬼

唔需要技能，最緊要有表演慾同埋夠嚇，新手入門嚟講，時薪都有$50-$60。工時不定，但如果真係返嘅話每日都要預一粒鐘化妝一粒鐘落妝，仲要嗌破喉嚨嚇鬼，真係辛苦錢嚟。