2015年05月22日 星期五
教你試答見工怪問題
話說外國有個叫Glassdoor嘅網喺過萬條打工仔分享上去嘅面試問題入面，篩咗10條做「2015年度最奇怪面試問題」。毛孩知你哋都心郁郁諗住轉工㗎喇，專登幫你問咗Glassdoor嘅職場專家Rusty Rueff同專門寫書教人面試嘅作家John Lees點答。
問題：而家要你幫一架裝滿雷根糖嘅747客機落貨，你會點做？
應徵：IT支援經理
專家教路：邊個話唔可以問返腦細轉頭㗎？問吓佢啲糖係散裝、盒裝定箱裝㗎喇！
毛孩試答：點解我做IT支援經理要去搬貨？
問題：蜘蛛俠大戰蝙蝠俠，你覺得邊個會贏？
應徵：醫療模擬師
專家教路：認真便輸了，解得通畀腦細知，贏嘅咪係你囉！
毛孩試答：導演，呢齣戲一定好收得！
問題：如果你係飛機空難嘅唯一生還者，你會點做？
應徵：民宿網站安全調查員
專家教路：要喺適當嘅時候表現一吓自己正面嘅個性，例如悲天憫人之類嘅。
毛孩試答：我會即刻同架機影張自拍、上網打卡……我指報平安！
2015年05月22日 星期五
教你試答見工怪問題
問題：你會點同一個盲人解釋「咩係黃色」呀？
應徵：空中服務員
專家教路：諗唔到點答就讚吓腦細條問題，幫自己爭取啲時間諗喇！
毛孩試答：你呢條問題問得真係好，我都好樂意解答你嘅問題，咁呢，我呢，就會呢……同佢哋講黃色係#FFFF00！
問題：你今日早餐食咗啲咩呀？
應徵：銷售助理
專家教路：答得有幽默感一啲，可以令腦細對你印象深刻啲。
毛孩試答：你Honey煮嘅愛心餐……講笑啫！
對比起我答嘅答案，我知你心入面一定更加想答：「我做乜要去卸貨？」、「蜘蛛俠大戰蝙蝠俠？我咪喺側邊食花生囉」之類。不過唔得咁㗎，見工面試就係一個鬥chok嘅比賽（贏咗就可以得到張賣身契），真實嘅你都係留返正式返工之後，畀腦細一個驚喜啦！
