大台行返ThisATV條舊路，玩重播舊劇、翻拍舊劇嚟提高收視。認真，而家得返佢一個免費台，播雪花都得啦（除咗宮雪花之外）！六月就會開始重播《他來自江湖》喇，不過時代唔同喇，好多對白到咗今日，都已經唔同講法喇。如果重播唔止有字幕，仲有2015字幕版就好喇！嗱，毛孩手痕口痕周身痕咁配咗幾句，你哋覺得點？

情境：個阿禪喺度彈阿玉（毛舜君 飾）嘅衣著，阿水（星爺 飾）立馬兵仔救美窒返阿嬋。

當年對白：「你係咪想我炳你一鑊甘甘都冇咁甘㗎」

毛孩新編：我諗其實阿禪都load唔到阿水講咩，相對嚟講，而家嘅講法就淺白好多喇：「嬲打呀嘛，大媽？」

情境：阿水蛇王畀天哥（萬梓良 飾）發現，就用天下間最廢嘅理由「塞車」Hea答過關。

當年對白：「塞車塞到隻狗咁」

毛孩新編：勢估唔到《他來自江湖》拍嘅時候，觀塘就已經係塞車嘅重災區，不過而家已經進步咗好多，要用「塞車塞到核爆！」先夠殺。

情境：阿水諗住揸架靚車扮威威豬，點知最後變咗遊街市，仲整到架車污糟晒。

當年對白：「呢舖都可算係代表作喇！」

毛孩新編：如果係而家，佢應該就會話「呢舖真係喊～出～嚟～！」

情境：阿水畀人讚佢唱嗰隻歌好得意，令佢覺得自己終於搵到知音鳥。

當年對白：「你都覺得好得意呀？」

毛孩新編：時代唔同喇，識講就梗係講：「你都覺得巧打耳呀？」

情境：阿水以為自己扮聾己經好高招啦，點知個工人先係神級，扮盲喎！

當年對白：「唔係呀嘛！」

毛孩新編：唔係呀嘛，咁普通，而家鍾意講「Gag嚟㗎？我是咪要笑㗎？」。

情境：阿水畀自己老竇激到好嬲豬，要飲涼茶下火。

當年對白：「家下我焮烚烚呀」

毛孩新編：你又焮我又焮，咁場交唔會完㗎喎，嬲得嚟扮吓可愛咁講返句「堅係嬲嬲豬囉」，大家都好落台嘛。

情境：明C9（李香琴 飾）讚個豬妹讚到佢天上有地下無咁，阿水表示不屑。

當年對白：「佢忽嘅，醫返都嘥藥費啦！」。

毛孩新編：時代變咗，醫學都進步咗，好多嘢都有得醫㗎喇（好似係），轉做「佢膠㗎，唔好放棄治療」啦。

情境：阿水想溝阿玉，余姣（恬妞 飾）就成粒電燈膽咁阻住晒話要查字典，仲拉走阿玉去幫自己，阿水堅係嬲到啤一聲！

當年對白：「順便幫我查下，諸事八卦唔通氣乞人憎大枝嘢正笨橙懶叻叻唔切英文點講」。

毛孩新編：「同朕check下，厚多士唔識D689宇宙漿硬膠無極限老實實唔切普通話點講」。

圖片來源：《他來自江湖》截圖