神沙，可能係香港地最乞人憎最雞肋嘅貨幣。唔少餐廳串過馬L唔收毫子，特衰政府又規定唔可以用毫子畀錢多過兩蚊，喺呢個通漲不似預期嘅年代，兩蚊？乜Spring都買唔到呀！毛毛唔忍心見到你堆到成屋神沙搞到滿身銅臭，快啲用以下方法送佢走吧啦：
超級市場/便利店
好老實講，限住你淨係可以用兩蚊毫子，根本連啲推廣優惠都買唔到，唯有當逐少逐少洗走佢。
輕鐵
住喺新界嘅牛屎巴打一定知道，喺輕鐵月台買飛一定中伏，因為部機找親都係一毫兩毫。為咗令自己唔好成為最後一個受害者，你都要用毫子買飛，等佢繼續有神沙找畀下一個。
巴士
巴士嘅車費通常都三尖八角，好似$18.4，$21.9咁，如果你八達通負錢，又成日貪方便畀齊頭就蝕到入肉，呢個時侯神沙就可以嚟個華麗轉身幫到你。
汽水機
雖然話政府規定唔可以用多過兩蚊嘅毫子買嘢，但汽水機又唔識講嘢，又冇人證物證，今次佢嗌破喉嚨都阻止唔到你霸王硬上弓，神沙買可樂！
買郵票
可能你好耐冇寄信，但撳下郵票機就可以洗走咗$1.4，其實性質同洗黑錢冇咩分別，都係洗走啲唔想要嘅錢變成有用資產，你當自己係教父會唔會好過啲？
銀行回收
如果你儲夠$100以上嘅神沙，首先要自動分類唔同毫子，而你要唱多過$500，就要畀總額嘅1-2%手續費，所以唔儲夠一千幾百都唔好去呀。
政府流動收銀車
金管局而家有兩部流動收銀車，每星期喺唔同區同你收神沙。口痕問句，如果呢架車趺咗錢，會唔會有人執呢？
示威
如果大家夠齊心，將儲埋儲埋嘅神沙一齊拎去政總堆泥沙，嗌口號「我要真港紙」，逼佢立法提高返用毫子消費嘅金額，追貼返個通脹，咁大家自然就肯袋住先……我指神沙。
