《食神》教落，只要有心，人人都可以係男神。唔係下下都要高富帥，好似有父幹有樓仔嘅大劉仔先得嘅，連豬肉佬都可以叫肉類分割技術員，你就知男神無分貴賤，仲分分鐘越市井越吸引，貪佢肯忍氣吞聲做勞動工作，有血有汗有肉地，諗起都痕痕哋……嗚呀，仲等？一齊左青龍右滑鼠睇J……我講J圖咋衰鬼。

合益巨人

呢張攝於元朗合益街市外嘅爆肌推車男慾肉照喺網上瘋傳，簡直為港增光。

毛孩只想學《少林足球》嘅田雞問一句，如果我係架手推車，唔知……我頂唔頂得住呢？

瀟灑豬肉榮

望見呢位哥仔隻手瓜就知佢係個出色嘅男人，就算匿喺廣西南寧一個街市入面，一樣好似漆黑中嘅螢火蟲一樣，咁鮮明！咁出眾！瀟灑程度僅次敝台東方昇！

台北涼糕哥

呢位擁有完美腹肌嘅涼糕哥，係台灣北大體育系學生，仲要係排球校隊喎……連睇慣中國女排嘅毛毛都想用黃一梅式重炮轟一轟佢，同佢嚟個特訓，hehe。

洗碗小哥

來自廈門大學嘅洗碗哥兼職去做Café，可惜太靚仔所以畀人影咗相仲放上網，從呢個低炒角度、恤衫顏色同姿勢所見，唔知點解……我諗起我其中一位腦細。

有奶便是男神

喺華東理工大學沖奶茶嘅佢，係咪同打過NBA嘅香港巨星FishermanLok有啲似？嗯，其實我都好鍾意飲奶奶㗎……

湖南燒餅哥

呢位燒餅哥夠膽死自己開檔叫「帥哥燒餅」，門外仲經常排晒長龍，對自己個樣充滿信心。忽發奇想，如果毛毛又想開檔嘢，不如集思廣益下應該叫咩名？

寧波饟餅大叔

你睇阿大叔佢有朝偉嘅眼神，金城武嘅外型，集二人之長在一身，但係聽聞佢阿爸阿媽要佢去相睇，乜原來大陸啲相睇咁高質素㗎咩？

小司機

蘇州地鐵一號線嘅呢位司機靚仔得嚟充滿陽光氣息，唔少豬妹都要組團搭地鐵會佢一面。但問心吖，如果佢係港鐵舉牌擋人衝門嗰個，你一早X到佢化啦。