天文台平時老是唔出現，但一出現總係招招搖搖搞s棍，上波落波仲飄忽過《頭文字D》嘅姐倫，唔信睇吓以下幾單案例，佢哋真係好鬼鍾意同巿民玩遊戲：

2015年──黑雨

今年5月26日，天文台喺朝早9點40分掛黃雨，20分鐘後變紅雨，25分鐘後再變黑雨，65分鐘後變返黃雨，一句講晒都係要返工囉。咁嘅情況，只好無奈唱句：「佢家下紅色雨，又變返掛黃色雨」。

2013年──尤特

喺2013年8月14日，天文台竟然喺下晝1:40由8號波改掛3號波，其實只要掛多20分鐘，就算落咗波都唔使返工，點知天文台就係咁絕，X！趕人返工燒Spring袋呀？

2013年──天兔

2013年嘅颱風天兔，喺星期日掛8號波，但星期一朝早10點就落波，唔少市民只好哼出：「天兔不似預期」同「Holiday我真係好愛你」後，死死氣返工。

2010年──黑雨

你可能唔記得，不過我就記得好清楚，喺2010年7月23日，天文台同眾打工仔開個玩笑，喺收工時間5點幾掛黑雨，橫風橫雨走唔到焗住OT，唔通連個天都唔鍾意我？

2009年──巨爵

2009年嘅颱風巨爵喺上午10點15分，將原本嘅8號波改發3號波，繼續推一眾打工仔落職場火坑繼續捱，令大家一場歡喜一場空。

2009年──莫拉菲

2009年嘅莫拉菲喺星期六半夜來港，唔少市民一覺瞓醒也無風雨也無晴，只好同天文台講句：「星期六，半夜，八號波，關我L事咩？」

2007年──利奇馬

當年呢個利奇馬風速高達60公里，風勢可謂相當強勁，點鬼知個天文台就同強國武媚娘一樣守波如玉，一個波都唔肯掛，咁孤寒㗎......

要繼續數嘅話，七七四十九日都數唔完呀，我都未同佢計平時話會落雨，呃咗我cancel晒同女神嘅約會之後鬼死咁好天嗰啲數呀！