作為香港人，Sad but true都要講句，雖然一日有24小時，但你等待嘅時間分分鐘佔咗你一日1/3時間。無他嘅，喺香港地，唔理做乜都請你排隊請你等等，等到花兒也謝了都未到你，以下各樣等到炆嘅情況一定發生過喺你身上：

無限輪迴櫃員機

每次你想撳個快錢走人，前面個C9硬係霸住部機瘋狂過數，即使你喺後面喪Jip佢啤佢，但望住佢一張張收據彈出嚟，你炆到淨係想講句：「X你老味快L啲啦嘛。」

狗巴去哪兒

狗巴出晒名班次疏，仲經常遲埋站，要等30分鐘不是夢。真係留低等又炆，等等下唔等又覺得笨實。你實有諗過架狗巴埋站你會鬧爆個司機，不過冇做過咋嘛，可？

輪大米

香港人食飯要等位是常識吧，冇人識嘅要半粒鐘，上過報紙同Openrice多打手嘅隨時要等個半鐘，等得嚟午餐變下午茶，晚餐變宵夜，未食嘢已經成肚火。

急症室困獸鬥

無事不登急症室，因為入得去唔坐返三四粒鐘都走唔甩，班醫生護士又忙到踢晒腳西晒面，成個氣氛鬼死咁壓抑……都係返屋企啪粒丸算啦唉。

朋友係要見嘅

返工做到隻J蟹咁，諗住同朋友聚下鬆一鬆？冇半年都約唔成啦，就算約得成都總有人即日甩底或者遲晒大到。講真吖，唔想嚟索性咪唔好嚟囉，巴屎閉。

飛機場惹的禍

以為放假去旅行可以離開香港呢個鬼地方？Sor，唔理你起飛定降落，都要有Delay的自覺，等返三兩個鐘頭其實好閒。

上樓需父幹

冇父幹嘅你，份糧啱啱高過公屋入息限額，唔想租人樓幫人供樓，講起買樓更加絕望到淨係識擘大個口，等足一世都上唔到……你問我可以點？知嘅我就唔使撈啦！仲坐喺度寫稿畀你睇？

我要真普選

我要真普選說來動聽，但只要大家守唔住個括約肌諗住袋住先，咁就分分鐘袋一世，成世畀人揸住個Spring袋仲學咩人等普選？到時你只能慨嘆：「不能回頭，多年前早明言不能回頭」。