東尼大木專登寫首歌叫大家聽媽媽話，但係咪真係咩都要聽？有冇發覺自己細個成日畀阿媽老點？阿媽有啲說話，真係信佢一成，雙目失明。
阿媽幫你儲起啲利是錢
最多人聽過嘅一句，亦係全港最大騙案，受害人之廣，金額之大，係無法統計。如果毛孩攞得返錢，相信筆錢都夠去日本幾次。
先生話你勤力啲，成績就會好
家長日之後最常聽到嘅金句，都唔知阿蛇是咪真係咁講過嘅……
橡筋會吸血
呢個算係比較上一代嘅大話，其實橡筋有咩危險，點解唔畀玩？
講大話甩大牙
靠嚇咩？望下689，就知呢句嘢有幾流啦。
吞核落肚會發芽 / 吞香口膠會黐住條腸
呢個簡直係童年陰影，老媽子，我到而家都唔食生果，同埋口臭得滯識唔到女仔，其實都唔係我嘅錯囉。
打得機多會壞眼
打一個鐘機就壞眼，溫十二個鐘書就咩事都冇。生物學嘅嘢，我溫足36個鐘都係識得條鐵咋。
食多啲蔥會聰明呀
我懷疑阿媽收咗菜檔廣告費囉，食蔥會聰明，咁點解我仲係考唔到第一、攞唔到First Hon、賺唔到第一桶金、上唔到車……
畀心機讀書，大個會搵到份好工
好多人就係太畀心機讀書，先淪落到要返份奴工（利申：讀書少、每日返19個鐘、人工唔夠14K）
成日走數
阿媽個下巴應該好輕，就算勾咗手指尾嘅承諾，例如考到一百分就送玩具乜乜乜，但最後同真普選一樣，到而家都未實現過。
曳就搵差人拉你
一直以為係大話，點知原來係1001句真話。鳴鳴，媽媽我知錯喇，快啲嚟幫我保釋啦。
