節目重溫
星期三港案

良心發現,認真製作,

緊貼時事,淺入深出。

毛記電視新聞部出品,每集5至10分鐘不等,

毛記主播聲音導航,超微型新聞紀錄片。

啱啱嘅星期三(12/6),政府因無視103萬市民遊行反對逃犯條例嘅聲音,引發咗一場大型示威活動。市民包圍政總要求徹回惡法,更佔據夏慤道行車線。

衝突中,警方一共使用超過150枚催淚彈,甚至發射橡膠子彈、布袋彈驅散示威者。有示威者頭部中彈送院,就連記者都受牽連。我哋搵到當日企喺前線報導新聞嘅記者林彥邦,睇下佢鏡頭下當日嘅香港,同平日到底有幾唔一樣。
近日,「逃犯修訂條例」鬧到滿城風雨,政府喺爭議聲中不斷宣傳兼硬推,甚至聲稱有好多社會團體支持修訂。一班反對條例嘅香港人為咗「唔想被代表」,決定自發擺街站、甚至搞網上聯署,收集反對惡法嘅聲音,同時召集各位街坊一齊行出嚟,用腳將最大嘅反對聲音傳到政府耳中。
上星期,台灣成為亞洲第一個同志婚姻合法化嘅地區,雖然只係一海之岸嘅香港同志就冇台灣咁幸福,不過唔少同志情侶喺呢個重要時刻出嚟,一方面為佢哋高興而慶祝,另一方面亦係藉此為香港同志爭取合理嘅權益,希望有朝一日唔需要再羨慕其他人,可以喺自己生活嘅地方同另一半有個合法嘅名份,毫無顧忌咁愛身邊最愛嘅一個。
邊個話鞦韆只係細路仔玩意呀?

就好似呢個男仔咁鍾意到叫自己做「鞦韆先生 」。佢由2015年開始已經不斷去各區尋找有鞦韆嘅公園,唔經唔覺4年嚟已經搵咗成200幾個,最近仲整咗個「全港18區鞦韆分佈圖」,實行要玩盡全香港所有鞦韆,做返個大細路呀。
幾年前,Anson留意到屋企人有白頭髮問題,但又唔想佢哋用市面上啲化學染髮劑咁傷頭髮,後嚟知道Henna染髮可以喺唔損害健康下解決白頭髮問題,決定開間社企專門幫人做天然染髮,每日仲會為癌症病人免費義染,等佢哋唔再怕滿頭白髮,重拾返自信呀!
逢隔個禮拜六嘅朝早10點,喺將軍澳嘅坑口站天橋底,會有一個叫「正澳」嘅社區回收站,專為將軍澳居民做塑膠回收。發起人並唔係來自乜乜組織,而係兩個住喺將軍澳嘅街坊Zoe同阿Mi。

佢兩個做咁多嘢,為嘅唔止係環保,仲係想透過社區活動,拉近人與人之間嘅關係,同埋搵返社區應有嘅人情味呀!
呢兩個星期,先後發生兩宗視障人士被誤解嘅案件:

1)一位患嚴重弱視球迷因用望遠鏡睇波而被誤當賭波集團成員;
2)一位失明人士排隊等車期間因用手機而被誤當「扮盲搵食」;

誤會事件最後引發成網絡公審甚至罵戰,其實對視障人士嚟講,每一次誤解都可能會造成心靈創傷;而喺公審之前,又有幾多個人可以理智地分析一下,避免未審先判呢?
兩個月前,有外判清潔工被影到喺公廁洗手盤上食飯,最近就有勞工組織公布一項調查,發現原來超過七成嘅清潔工面對同樣問題,甚至發現佢哋用嚟休息嘅值勤室,設施同環境問題亦好嚴重。做咗8年清潔工嘅明哥認為,工人待遇從來唔合理,即使願意出嚟發聲,但又有邊個真係可以幫到佢哋呢?
呢個花名叫「小鐵漢」嘅Kansas,今年2歲。佢喺媽媽Doris產檢時已經發現心臟發育不全,出世冇耐已經做咗3次開腔手術,仲喺心口留低咗一條長長嘅疤痕。作為爸爸嘅Jayco為咗鼓勵囝囝,決定喺身上紋上一模一樣嘅「疤痕」,誓要做「疤痕父子兵」咁話呀!
你知唔知2019年至今呢4個月,原來總共發生咗大約250宗自殺個案?

呢個數據係嚟自一位叫Benny嘅記錄者,佢喺年頭整咗個記錄香港自殺個案嘅統計表。佢話咁做,係因為留意到有好多人因一時睇唔開而做傻事,所以希望大家關注香港自殺問題,同時亦希望關心一下身邊嘅人,因為一句說話都可能救得返一條寶貴人命㗎。
毛記電視網站 · 版權所有 · 不得轉載 Copyright © TVMOST.COM.HK All rights reserved