匯豐紀念鈔噚日開始有得拎喇，不過有報道話拎咗35連張嗰啲同揸住個炸彈冇乜分別，因為冇乜人肯接貨，隨時輸到粉身碎骨。唔理佢真好假好，毛孩一向勤勤力力，一早返咗工，唔會賺埋呢啲外快嘅（其實係這些機會......）。但係如果你而家揸住35連張 又唔知點算好，等毛孩教吓你啦。

Make it rain

毛孩成日幻想等自己發咗達嗰陣時一定會試一次，落到club好似啲外國黑人rapper咁拋晒啲銀紙上天，等啲銀紙好似雨咁落落嚟。你今晚都可以試吓拎住呢35連張落老蘭度make it rain，可能你會有意想不到嘅驚喜。

當廁紙用

唔知大家仲記唔記得大約十年前有班人喺維園年宵市場度賣自創鈔票廁紙，但係就畀匯豐禁鬼咗，搞到人血本無歸。你揸住嗰35連張又放唔鬼到，不如把心一橫銀紙當草紙用，總算係做到廢物利用。

摺紙

橫掂揸住啲銀紙等人收，你可以考慮吓攞張銀紙嚟摺吓。一個唔該咁好彩摺到變咗藝術品，賣得幾個錢都不致於血本無歸咁慘情。

所以最霸氣嘅做法都係……

攞嚟用

人哋攞嚟炒、攞嚟收藏嘅時候，有乜霸氣得過你真係攞嚟用（特別係當你抽到呢個冧把）？當你喺舖頭度買嘢嗰陣，攞張150蚊紀念鈔出嚟俾錢，仲要大大聲話唔使找，全香港最霸氣仲唔係你？