根據美國科學家進行嘅研究，得出咗一個震驚全球七十億人嘅結論，就係原來「反手摸到肚臍就是好身材」喇！聽聞強國仲有個女仔因為證明自己有好身材屈到隻手甩埋臼，相當英勇。不過毛毛係唔會因為咁而退縮嘅！今次就喺毛記電視城搵咗3個（自認）身材fit到漏嘅毛孩sss做人肉測試啦！

挑戰者1號：編輯部欣欣女神

挑戰結果：成功！

毛評：編輯部欣欣女神一個反手就掂到個肚臍，仲記得甜笑?，夠晒標準！

挑戰者2號：毛記電視安不尊

挑戰結果：差少少成功！

毛評：差少少，差少少，安不尊只係差10-12 cm就掂到喇（咁係唔係即係要減多12cm腰？）！平時反多幾下碗面就應該冇問題㗎喇。不過佢就表示自己未拉好筋、未盡全力喎……

挑戰者3號：新聞部主播東方昇

挑戰結果：非常成功！

毛評：愛國主播東方昇即使頭部受傷，都係3個之中最輕鬆最超卓咁就完成呢項任務嗰個挑戰者，「易如反掌」咪呢啲囉，佢同時亦體現咗國家搬肚臍嘅優良傳統。東方昇，完勝！

後記：3位毛孩挑戰完之後，不約而同都表示隻右手長咗（好似係）。