淋病司長今日下晝喺立法會審議政改方案期間，喺紙度寫上八字真言「太上心，要保重身體」，引嚟大家嘅猜測，到底佢呢句係同邊個講呢？

Tree gun

Tree gun議員醉心研究鍾式成語，但係班網友太膚淺唔能明白，咁咪叫佢當網友嘅意見子烏虛有，千祈唔好畀啲雞毛鴨蒜嘅言論影響心情，鼓勵佢繼續堅持創作（應該係咁）。

撐政改號碼兵

今日立法會外示威區有大批著號碼衫嘅號碼兵出現，淋病娘娘體諒兵仔，想話如果著到咁都仲畀大佬走數嘅話，千祈唔好上心，因為撐政改呢家嘢，講心唔講金㗎嘛（好似係）！呀仲有，天時暑熱，小心唔好中暑呀！

港媽

港媽為咗仔仔可以成龍，又搬屋，又轉兼職，仲報11個興趣班，堅chur！奶媽應該係想講「成龍定成蟲，唔好太上心」，因為成功靠父幹嘛，同個細路讀幾多個興趣班冇關係㗎（好似係）。

強國足球隊
愛國司長關心強國隊都好正常啫，港隊好有層次咁贏咗兩場世界盃外圍賽嘛，不過國家傳統都話友誼第一，比賽只係第二，何況港隊同強國隊嘅關係邊止友誼咁簡單，直情血濃於水?啦。所以司長想提佢哋唔使咁上心，防著點就可以鳥，最怕等陣日操夜操操壞身子咋（應該係）。

自己

努力咗咁耐，我諗佢都攰喇，到咗接近「放榜」嘅一刻，佢可能只係想鼓勵自己盡咗力就得，好似早排落區咁落力揮兩下手就達到宣傳效果一樣，結果係點唔好太上心，最緊要保住自己健康先可以繼續為主子辦事嘛（我估㗎咋，我又唔係佢肚入面條蟲，點知啫）。