十八年前嘅今日，係英國管治香港嘅最後一日，當然絕大部分愛國愛港嘅同胞都非常熱烈地慶賀呢件盛事，之但係，總有啲唔爭氣嘅人係會唔捨得畀英國佬統治嘅日子，就好似佢哋咁，經常不自覺咁表達出戀殖嘅情懷。

用返殖民時代地名

早兩個月，西港島線西營盤站啟用嘅時侯，畀人發現將而家已經改咗做菲臘牙科醫院嘅地方，寫返做菲臘親王牙科醫院，係嘅，加返「親王」兩隻字，成件事親切好多嘛。

全家入籍英國

好似阿月娥咁，傳聞佢老公同仔女都全部係英國籍，仲喺英國讀書生活。重點係，就算你全家都喺晒英國，你本人一定要留喺前殖民地工作同生活，咁先至真係戀殖呀。

配戴女皇頭衣飾

由於對英國太過留戀，有時唔願戴由皇冠改咗做朵花嘅警帽係在所難免，Madam仲要帶住皇冠警帽出鏡向世界表達心跡，咁先係皇家香港警察嘅驕傲嘛。

改名表達心聲

不過以上呢啲都唔夠全面，唔夠徹底！梁生除咗啲仔女都喺英國讀書，佢本人連個名都叫做「振英」，去到邊都掛住「振興英國」（好似係），但係仲自願留喺香港呢個小小嘅殖民地。上任特首以嚟，努力證明畀全世界睇香港冇咗英國管治之後係幾咁淒涼，直情係一振大英帝國嘅聲威呀！

嗱！真係愛國愛港呢，應該就好似呢個老闆咁，拎女皇頭一蚊嚟唔做你生意呀，等班廢青咁鍾意女皇頭吖嗱。